“Ortada daha ciddi məsələlər olsaydı…” – Xələf Xələfovla Andrey Rusenko nədən danışıb?
11:49 / 02.09.2021
1434
Ötən gün Azərbaycan xarici işlər nazirinin müavini Xələf
Xələfov və Rusiya xarici işlər nazirinin müavini Andrey Rudenko arasında
telefon danışığı olub.
Ümumiyyətlə, son aralar bu istiqamətdə çox danışıqlar
gedir. Maraqlıdır, yekun nəticə nə vaxt əldə edilə bilər?
Döyüşlərin başlamasının ildönümünə yaxın
üçtərəfli bəyanatın icrasının tam həyata keçirilməsi real görünürmü?
Mövzu ilə bağlı Sfera.az-a danışan politoloq Əlimusa
İbrahimov nazirlərin görüşünün Azərbaycanı
narahat edən ciddi məsələlərin mövcud olmaması ilə əlaqələdirib:
"Ermənistan xarici işlər naziri
Ararat Mirzoyanın Moskvaya səfəri və orada aparılan danışıqlar barəsində ilk mənbədən
məlumat almaq, Rusiya xarici işlər
naziri Sergey Lavrov və onun Ermənistandan olan tərəf
müqabilinin bəyanatlarına aydınlıq gətirmək üçün ikitərəfli
təmasa zərurət yaranmışdı. Bu təmas iki ölkənin xarici işlər nazirlərinin
müavinləri səviyyəsində həyata keçirildi. Bu da ortalıqda Azərbaycanı narahat
edən ciddi məsələlərin mövcud olmamasından xəbər verir. Daha ciddi məsələlər
mövcud olsaydı, daha yüksək səviyyədə - Bayramov-Lavrov səviyyəsində, müzakirə
olunardı. Bu həm də Ararat Mirzoyanın ilk səfərinin Azərbaycan üçün mühüm əhəmiyyət
kəsb etməməsi anlamına gəlir. Ararat Mirzoyan isə elə ilk səfəri ilə diplomatik
sahədə çox zəif fiqur olduğunu nümayiş etdirdi. Onun rusca "tirajlama” sözünü tələffüz
edə bilməyib, erməni dilində deməsi lap komediya filmini xatırlatdı. Burada Azərbaycanfilmin
istehsalı olan çox məşhur film personajlarından birinin atalar sözünə çevrilmiş bir ifadəsi yada
düşür: "Buna da bir quş.”
".
Politoloq həm Azərbaycan, həm də Rusiya tərəfinin
real nəticələr əldə etmək istəyinin olduğunu vurğulayıb:
"Xələf Xələfovla Andrey Rudenko arasında söhbətə
gəlincə, təbii ki, əsas mövzu burada da Azərbaycan, Rusiya və Ermənistan liderlərinin
10 noyabr 2020-ci il və 11 yanvar 2021-ci il tarixli üçtərəfli bəyanatlarının
icrasına həsr olunmuşdu. Xələf Xələfov müsahibinə bu sahədə son günlər baş verən
hadisələrə Azərbaycan tərəfinin mövqeyini izah edib, ermənilərin böyük heyətlə
Xankəndinə toplaşmasının kövrək sülh prosesinin pozulmasına səbəb olacağını və
eyni zamanda Rusiya sülhməramlılarının fəaliyyətsizliyini, daha doğrusu ermənipərəst
mövqe tutmasını tərəf müqabilinin diqqətinə
çatdırıb.
Son zamanlar danışıqlar prosesinin sürətlənməsi və
liderlərinin 10 noyabr 2020-ci il və 11 yanvar 2021-ci il tarixli üçtərəfli bəyanatlarının
icrasının reallaşdırılmasına çağırışlar tərəflərin real nəticələr əldə etmək
istəmələrindən irəli gəlir. Digər tərəfdən, bu bəyanatın yerinə yetirilməsi Ermənistanın
döyüş cəbhəsində məğlub olmasının siyasi cəhətdən təsdiq olunması anlamına gəldiyindən,
orada bu prosesə ciddi mane olmaq yolunu tutan qüvvələr var. Onlar bu prosesin
və Paşinyan hökumətinin atdığı digər addımların qarşısını almağa səy göstərirlər".
Ekspert üçtərəfli bəyanatın tam icra müddəti ilə bağlı
da danışıb: "Elə buna görə də üçtərəfli bəyanatın maddələrinin
tamamilə yerinə yetirilməsi haqqında konkret tarix vermək mümkün deyil. Tərəflər
üçün əsas məsələ prosesin başlamasıdır. Maneələr elə bunun üçün yaranmış işçi
qruplarının fəaliyyəti nəticəsində aradan qaldırılacaq. 44 günlük müharibənin
birinci ildönümünə qədər olmasa da, yaxın 3-5 ilə qədər erməniləri konstruktiv
mövqe tutmağa məcbur edəcəyimizə inanıram".
Sfera.az
