Azərbaycanda onlarla insanın aldadıldığı “give away” tələsinə son qoyulur? - "Vergi tutula bilər"
13:53 / 31.08.2021
1662
Son zamanlar Azərbaycanda fenomenlərin, blogerlərin təşkil etdiyi "give away”lər, yarışmalar geniş yayılıb. Müşahidələr göstərir ki, əksər hallarda sözügedən yarışmalar insanların aldadılması ilə nəticələnir. Bu sahəyə heç bir nəzarət yoxdur desək, yanılmarıq.
Bəs, problemin həlli yolu nədir? Yarışmalar hansı formada tənzimlənməlidir?
Bununla bağlı Milli Məclisin Hüquq siyasəti və dövlət quruculuğu komitəsinin üzvü Tahir Kərimli Sfera.az-a açıqlamasında Azərbaycanın bazar iqtisadiyyatı ölkəsi olduğunu xatırladıb:
"Bu, kapitalizmə, pula söykənən bir quruluşdur. Belə bir vaxtda istənilən pulun hesabı aparılmalı, qanunvericilikdə nəzərdə tutulduğu kimi gəlirlərin vergisi olmalıdır. Hətta gəlirləri əldə etməyin də öz qanunvericilik yolu var. Azərbaycanda hansısa yarışmaların təşkili elan edilməlidir. "Yalnız dövlət orqanları bunu təşkil etməlidir”, - deyə bir qadağa yoxdur. İstənilən ictimai qurum, istənilən fiziki və ya vəzifəli şəxs bunu edə bilər. Lakin mütləq rəsmi qeydiyyatdan keçməli, öz hədəflərini, vəzifələrini müəyyən etməli, əldə olunacaq gəliri gizlətməməli və onun vergisini ödəməlidir”.
Müsahibimizin sözlərinə görə, dövlət orqanları tərəfindən qeydiyyatdan keçməyin bir mənası da ondan ibarətdir ki, həmin yarışmaların Azərbaycanın konstitusion quruluşuna, mənəviyyatımıza, əxlaqımıza, cəmiyyətdə sağlam münasibətlərə qorxusunun olub-olmamasını müəyyən etmək olur:
"Hər hansı atılan addım, təşəbbüs, pula bağlı münasibətlər mütləq dövlət qeydiyyatından keçməklə, müvafiq orqanlar tərəfindən qeydə alınmaqla və vəzifələri cəmiyyətə zidd olmayaraq müəyyənləşdirilməklə tətbiq oluna bilər. İstənilən mərc oyunları, lotoreya oyunları, yarışmaların hər birinin təşkili müvafiq orqanların qeydiyyatından keçməlidir.
Ümumiyyətlə, sosial şəbəkələrə nəzarət bizdə çox zəifdir. Bir tərəfdən istifadəçilər müqavimət göstərir ki, hüquqlarımız məhdudlaşdırılır və.s. İkinci bir tərəf, dövlət orqanlarının hələ bu sahəyə kifayət qədər nəzarət edə bilməməsidir. Məsələn, hələ də əxlaq və mənəviyyatla bağlı müəyyən məhdudiyyətlərin Azərbaycan tərəfindən deyil, sosial şəbəkə təşkilatçıları tərəfindən tətbiqini görürük. Amma Azərbaycan qanunvericiliyində kifayət qədər dəyişiklik olunub ki, sosial şəbəkələrə bu sahədə nəzarət olunsun, monitorinqlər keçirilsin. Bunun üçün müvafiq xidmətlər var. Təəssüf ki, bunlar icra edilmir və dövlət orqanları qarşısında məsuliyyət qoyulmur”.
Günay Rəsulqızı
Sfera.az
