“Azərbaycan futbolunun çiyinlərində daşıyan hocamız!” - FOTO
İdman
21:48 / 27.08.2021
2504
"Zirə”nin baş məşqçisi Rəşad Sadıqov rəsmi İnstaqram hesabında paylaşdığı foto ilə diqqət çəkib.
Sfera.azxəbər verir ki, gənc çalışdırıcı Qurban Qurbanovla şəkilini paylaşaraq, "Azərbaycan futbolunun çiyinlərində daşıyan hocamız!” cümləsini yazıb.
"Qarabağ”dan Polşa "Legiya”sına transfer olan, elə dünən "Slaviya" ilə keçirilən oyunda dubl edərək, klubunu Avropa Liqasının qrup mərhələsinə daşıyan Mahir Emreli də fotoya şərh yazıb.
"Yaxşı ki varsınız, hocamız”, - o bildirib.
Qeyd edək ki, Ağdam klubu ötən gecə UEFA Konfrans Liqasının pley-off mərhələsində Şotlandiyanın "Aberdin” klubunu mübarizədən kənarlaşdıraraq, ardıcıl 8-ci ildə də avrokubokların qrup mərhələsinə vəsiqə qazanıb. Rəşad Sadıqovun paylaşımının da buna hesablandığını təxmin etmək çətin deyil.
Nəzərə alaq ki, bu mövsüm Azərbaycanın dörd klubu avrokuboklarda mübarizəyə qoşulub. "Keşlə”, "Sumqayıt” ilk etapda mübarizəni dayandırıbsa, "Neftçi” əvvəl Çempionlar Liqasında, daha sonra Avropa Liqasında, ardınca isə Konfrans Liqasında uduzaraq, avrokuboklarla vidalaşıb.
Hazırda ölkəmizi avrokuboklarda təmsil edən yeganə komanda "Qarabağ” olduğundan əksəriyyət Azərbaycan futbolunun yükünün Qurban Qurbanovun çiyinlərində olduğunu düşünür.
Onu da əlavə edək ki, iki mövsüm öncəyədək "Qarabağ”ın uğurları üçün çalışan Rəşad Sadıqov Qurban Qurbanovla çox yaxın dostdur.
