"Erməni silahlı qüvvələrinin atəşkəsi pozması təsadüfi deyil" - Məqsəd nə idi?

Sfera.az bildirir ki, bunu politoloq Məhəmməd Əsədullazadə deyib. 

 

Onun sözlərinə görə, ilk səbəblərdən biri Azərbaycanın sərhəddə möhkəmlənməsinə mane olmaqdır:

"Digəri Fransa və Rusiyanın təhriki ilə ATƏT-in Minsk qrupu həmsədrləri çərçivəsində danışıqların bərpasına nail olmaqdır.  Eyni zamanda Azərbaycan tərəfinin tələbələrinin əksinə olaraq, böhranı davam etdirmək, beynəlxalq müstəvidə münaqişənin bitmədiyini və Azərbaycanın Ermənistan ərazisində olduğu görüntüsünü yaratmaq da bu səbəblər sırasındadır.

Moskva görüşündən sonra Rusiya rəhbərliyinin obyektiv açıqlamalarına baxmayaraq, Kreml iki ölkə arasında sülh sazişinin imzalanmasında maraqlı deyil. Məhz Rusiyanın müdafiə nazirinin müavininin Ermənistanda olduğunu nəzərə alsaq, erməni silahlı qüvvələrinin atəşkəsi pozması təsadüfi deyil".

Politoloq qeyd edib ki, hazırda Azərbaycana ciddi təzyiqlər var:

"Cənubi Qafqazda Avropa İttifaqı, ABŞ, Rusiya, Fransa, hətta İran da öz maraqlarını qabarıq surətdə göstərir. Hər biri problemi körükləməklə öz mövqelərinə uyğun olaraq idarə etməyə çalışır, Azərbaycana təzyiq siyasəti həyata keçirilir. Məhz sərhəddə baş verənlər Ermənistana bu və ya digər müstəvidə siyasi dəstəyin nəticəsidir. Amma bu kimi siyasi dəstək Ermənistanın daha da daxili siyasi böhrana yuvarlanmasına səbəb olacaq.

Bu təzyiqlər fonunda Türkiyə-Azərbaycan tandeminin proseslərdə uğurlu qalibiyyət əldə etməsi mümkündür. Ermənistanın bütün cəhdləri nəticəsiz qalacaq və Azərbaycan tərəfinin Minsk qrupunun fəaliyyətinə və digər şərtlərlə razılaşması gözlənilmir".