Hansı ölkədən hansı silahları ala bilərik? – Ekspert növbəti müharibə hazırlığını vacib sayır
14:27 / 02.03.2021
730
"Türkiyə ilə Azərbaycan arasında hərbi əməkdaşlıq
bütün istiqamətlər üzrə formalaşıb və bu gün də inkişaf tempi üzrə davam edir.
Hərbi tədrisdən başlamış Silahlı Qüvvələrin müxtəlif qoşun növlərində birgə əməkdaşlıq,
təlimlərin keçirilməsi, həmçinin hərbi-texniki sahədə satınalmalar, idxal-ixrac
sahəsində geniş əməkdaşlıq mövcuddur”.
Bunu Sfera.az-a açıqlamasında hərbi ekspert
Ramil Məmmədli deyib. O bildirib ki, təkcə
Azərbaycan deyil, o cümlədən Türkiyə də bizdən silah və texnologiyanın
satınalınmasına dair əməkdaşlıq edir:
"Təbii ki, Azərbaycan Türkiyə ilə müqayisədə
daha böyük alıcıdır. Bunun əsas səbəblərindən biri də Türkiyənin daha rəngarəng
və müasir tələblərə cavab verən müdafiə sənayesi məhsullarını istehsal etməsidir.
Lakin ölkəmizin qarşısında duran əsas məqsədlərdən biri də əməkdaşlığın daha da
genişləndirilməsidir.
Təkcə Türkiyə ilə deyil, dünyanın müdafiə sənayesi şirkətləri
inkişaf etmiş ölkələri ilə əməkdaşlıq qurulmalıdır. Türkiyə əsas istiqamət
deyil. Burada Qərb ölkələrinin, xüsusilə Amerika, Böyük Britaniya, Almaniya,
Fransa , Çin, Pakistan kimi ölkələrin hərbi sənaye şirkətləri ilə əməkdaşlıq, birgə
layihələrin icra olunması önəmlidir. İstərdim ki, Azərbaycan daha müasir məhsulların
əldə edilməsinə nail olsun”.
Ekspert xatırladıb ki, Qarabağ münaqişəsinin həllinə
qədər Azərbaycana Qərb tərəfdən rəsmi və ya qeyri-rəsmi müəyyən embargolar
qoyulurdu: "İnanıram ki, bundan sonra bu məhdudiyyət aradan qalxar və Azərbaycan
adını sadaladığım ölkələrlə bu sahədə yüksək səviyyədə əməkdaşlıq formatı
yarada bilər. Hansı məhsulların əldə edilməsini isə təyinatı üzrə demək
mümkündür. Əlbəttə, Azərbaycan müasir ordu quruculuğunu formalaşdırmış və
inkişaf mərhələsində olan bir dövlətdir.
Hesab edirəm ki, ölkəmiz artıq hava hücumundan müdafiə sisteminin gücləndirilməsi,
quru qoşunlarının istifadəsi üçün daha müasir texnologiyaların əldə edilməsi,
bundan başqa pilotsuz uçuş aparatları sahəsində yeni satınalmaların həyata
keçirilməsi və ya Azərbaycanda istehsalına dair işlərə başlayacaq. Ordunun əsas
tələbatı da məhz bu kimi istiqamətlər olacaq”.
Yeni müharibənin baş verməsi ehtimalından söz
açan R.Məmmədli bunun mümkün olacağını qeyd edib: "Bunu icra edəcək tərəf də
Ermənistandır. Lakin məsuliyyət daşıyan tərəf əlbəttə, Rusiya olacaq. Çünki
Rusiyanın hazırkı mövqeyi Azərbaycan xalqı tərəfindən qənaətbəxş hesab olunmur.
Məğlub tərəf olan Ermənistan yenidən dirçəlməyə can atır, xüsusən də Qarabağda
vacib mövqelərin hələ də ermənilərdə qalması xalqımızı narahat edir. Məsələn,
Xocalı şəhəri, Xocavənd rayonunun digər qalan hissəsi, Ağdərə və Xankəndi. Ümumilikdə götürəndə Azərbaycan
ordusunun imkanları məhz qeyd etdiyim ərazilərin də işğaldan azad olunması üçün
hər hansı məhdudiyyət yaratmır. Təəssüf ki, bu olmadı.
Rusiya üzərinə öhdəlik
götürdü ki, Ermənistan tələbləri icra edəcək. Ermənistan onda qalan rayonları
qaytarsa da, digər Dağlıq Qarabağ ərazisində olan yaşayış məntəqələrini –
Qaradağlı, Malıbəyli, Quşçular və.s
bunların azad olunması üçün hər hansı addım atmadı. Bununla bağlı lazımı
tədbirlərin görülməsi vacibdir. Narahatedici məqamlardan biri də odur ki,
sülhün bərqərar olunması üçün Azərbaycan siyasi iradə nümayiş etdirsə də, Ermənistandan
bunu görmürük. Qarabağda olan separatçı ünsürlər hələ də həmin ərazilərdə istədiklərini
edirlər. Bunların mövcud olması müharibə ehtimalını heçə salmır”.
Günay Rəsulqızı
Sfera.az
