Bişkekdəki etirazlarda onlarla gənc gözlərini itirib – Zərərçəkmişlər danışır

5 oktyabr mitinqində onlarla qırğız səs bombasına görə gözlərini itirib. Polislə qarşıdurmada yaralanan qırğızıstanlıların əksəriyyəti hələ də xəstəxanalardadır. 

Sfera.az Rusiya mətbuatına istinadla xəbər verir ki, parlament seçkilərinin nəticələrinə etiraz edənlər daha çox göz travması alıb. Jibek Beqaliyeva iğtişaşlar zamanı onlarla gənc oğlanın gözlərini necə itirdiyindən bəhs edib.

Ruslan Çeqirtgeyev növbəti dəfə müayinədən keçmək üçün oftalmoloqun yanına gəlib. Bu gün artıq 20 gündür ki, onun sağ gözü görmə qabiliyyətini itirib.

"İndi məlum oldu ki, daim həkim nəzarətində olmalıyam. Gözümün tikişi sökülməyib axı, gözüm hələ də görmür. ”,- deyə Çeqirtgeyev bildirir.

Həkimlərin sözlərinə görə, Ruslanın gözü tamamilə görmə qabiliyyətini itirib. Onun yerinə protez yerləşdirəcəklər. Bu bir neçə ay çəkəcək.

Ruslan, İssık-Kul bölgəsinin Ak-Suu rayonunda yaşayır, amma davamlı əməliyyatlara görə müvəqqəti olaraq Bişkekə köçməli olub. Ailəsi ilə birgə burada mənzil kirayələyib. Müalicə pulunu qohumlardan, dostlardan alır.

"Hər kəs gücü çatan qədər kömək edir, Gündəlik qəbul etməli olduğum dərmanları isə özümüz almalı oluruq. İndi könüllülər də pul yığmağa başlayıblıar. Dövlətə gəldikdə isə, hələlik bu haqda heç nə deyə bilmərəm. Çünki hələ ki, kömək üçün heç bir dövlət qurumuna müraciət etməmişik. Ümidvaram, müraciətimiz cavabsız qalmayacaq.”,- deyə zərərçəkən bildirir.

Onlarla digər qırğızıstanlı kimi, Ruslan da 5 oktyabrda Bişkekdə polislə toqquşma zamanı gözlərini itirib: parlament seçkilərinin nəticələrinə etiraz edən nümayişçilərə qarşı səs bombası istifadə edilib. Bunun nəticəsində həmin gecə milli xəstəxananın göz şöbəsinə 80-dən çox insan müraciət edib. Onların yarısı təcili əməliyyat olunub. Xəstələrin əksəriyyəti gənclərdir, heç 30 yaşları yoxdur.

Bişkekdəki milli xəstəxananın şöbə müdiri Baktıgul Mamıtova deyib: "Xəstəxanamızda eyni vaxtda dörd əməliyyat otağı işləyirdi. Xəstələrin ardı-arası kəsilmirdi. Axşam saat 10-dan ertəsi gün saat 11-ə qədər dayanmadan yaralanan gənclərin gözlərini əməliyyat etmişik”.

Ümumilikdə, parlament seçkilərinin nəticələrinə qarşı etirazlardan sonra mindən çox insan Bişkekdəki xəstəxanalara müraciət edib, zərərçəkənlərdən biri həlak olub, digəri isə hələ də komadadır.

Tərcümə etdi: Selcan

Sfera.az