Partiya sədri könüllülərinin fəaliyyətindən danışdı

Prezident İlham Əliyevin və Birinci vitse-prezident Mehriban Əliyevanın çağırışlarına cavab olaraq, Azərbaycanda fəaliyyət göstərən könüllü təşkilatları və hərəkatları tərəfindən yaradılan Azərbaycan Könüllülərinin Əlaqələndirmə Mərkəzi (AKƏM) öz fəaliyyətini davam etdirməkdədir. Bu gün AKƏM tərəfindən könüllülərin fəaliyyəti ilə bağlı bir sıra işlər görülür. Gənclər könüllülüyün, həqiqətən də, könül işi olduğunu sübut edən işlər görürlər.

Azadlıq Partiyasının sədri Əhməd Oruc Azərbaycan Könüllülərinin Əlaqələndirmə Mərkəzinin fəaliyyəti ilə bağlı "Report”a açıqlama verib.

Partiya sədri əvvəlcə xatırladıb ki, dövlət başçısının müvafiq sərəncamı ilə Azərbaycanda 2020-ci il "Könüllülər ili” elan olunub:

"Yeni növ koronavirus infeksiyasının yarada biləcəyi təhlükə ilə mübarizənin dəstəklənməsi məqsədilə AKƏM-in çətiri altında keçirilən aksiyalar çərçivəsində könüllülər tənha yaşlılara, aztəminatlı ailələrə baş çəkir, onların zəruri ehtiyaclarının qarşılanmasına köməklik göstərirlər. Həmçinin koronavirus infeksiyası ilə əlaqədar olaraq, qan qıtlığının təcili qana ehtiyacı olan şəxslərin həyatı üçün yaratdığı təhlükənin aradan qaldırılmasına fəal töhfə verirlər. Könüllülər "Böyüklərimizi qoruyaq!” devizi altında paytaxt və regionlarda könüllülər minlərlə tənha ahılların, aztəminatlı ailələrin, şəhid ailələrinin, fiziki məhdudiyyəti olan şəxslərin evlərinə baş çəkir, onlara müxtəlif ərzaq və gündəlik təlabat məhsullarından ibarət bağlamaların çatdırılmasında köməklik göstərirlər. Bu baxımdan mən könüllülərin fəaliyyətini yüksək qiymətləndirirəm”.

Ə.Oruc həmçinin əlavə edib ki, könüllülər əhali arasında pandemiya ilə bağlı maarifləndirmə işlərinin aparılması, küçədə maskasız gəzən şəxslərə tibbi maskaların paylanmasında da böyük həvəslə iştirak edirlər: "Hesab edirəm ki, bu, çox yaxşı bir addımdır”.