Müxalifət Əli İnsanovun puluna tamah salıb? – Sensasion açıqlama
"Düşümürəm ki, bu əməkdaşlıq Əli İnsanovun siyasi ambissiyasının gerçəkləşməsinə imkan yaradacaq”.
Sfera.az-a açıqlamasında bu sözləri Müsavat Partiyasının qərargahında müxalif partiya liderlərinin iştirakı ilə keçirilən Dəyirmi Masada sabiq səhiyyə naziri Əli İnsanovun da iştirakına münasibət bildirərkən politoloq Elşən Mirzəoğlu deyib.
"Əslində Əli İnsanovun müxalifətə və ya iqtidara dəstək verməsi onun konstitusion hüququdur. Amma Əli İnsanovun zamanında tənqid və təhqir etdiyi müxalifətlə indi eyni masa arxasında oturması əlbəttə ki, təəssüf doğurur. Azadlığa çıxdıqdan sonra İnsanovun vaxtilə Müsavat başqanı olan İsa Qəmbərdən üzr istəməsi də onun mövqeyini izləyən elektoratda müəyyən suallar doğurub. Amma düşünmürəm ki, Əli İnsanov o zaman İsa Qəmbərə münasibətdə yanlış siyasi mövqedə olduğunu güman edirdi, o vaxt kifayət qədər səmimi idi”.
E. Mirzəoğlunun fikrincə, İnsanovun tutduğu indiki mövqe göstərir ki, ortada siyasi konyuktura var: "Sabiq nazir sanki hakimiyyətlə münasibətləri qisasçılıq müstəvisi üzərində qurmağa çalışır. O ölkənin milli maraqlarına xidmət edən qüvvələrlə əməkdaşlığa getsəydi, daha anlaşılan olardı. Amma 1992-1993-cü illərdə hakimiyyətdə olub ölkəni siyasi-iqtisadi böhrana sürükləyən qüvvələrlə əməkdaşlığa getməklə özünün istinad etdiyi elektoratda da müəyyən suallar doğurub. Çünki İnsanovun maliyyə imkanları və kanallarından müxalif liderlər konyuktura baxımından istifadə edə bilərlər. Ancaq düşünmürəm ki, Əli İnsanov müxalifətdəki məlum kəsimin liderlərilə münasibətdə nələrsə əldə edə bilsin. Hər halda yaxşısını özü bilər”.
Elçin
Sfera.az
