İslandiya təbiəti qorumaq üçün əcnəbilər üçün vergi tətbiq edəcək

İslandiyanın Baş naziri Katrin Yakobsdottir hökumətinin adaya gələn əcnəbilərin sayını azaltmaq üçün turist vergisi tətbiq etmək üzərində işlədiyini açıqlayıb.
 

Sfera.az bildirir ki, İslandiyada turistlər ölkənin ekologiyasına problemlər yaradır.

Baş nazir Katrin Yakobsdouttirin sözlərinə görə, adanın infrastrukturu istirahət edənlərin axını səbəbindən ciddi gərginlik altındadır. Bu, ölkənin 2040-cı ilə qədər karbonun minimuma endirilmə planlarına təsir edir.

"Son on ildə İslandiyada turizm sürətlə artıb və bu, bizim ətraf mühitə və onunla bağlı planlara təsir göstərir"  - deyə baş nazir izah edib.

Qeyd edək ki, İslandiyaya hər il 2 milyondan çox turist gəlir, halbuki ölkənin cəmi 400.000 əhalisi var. İnsanlar adanın bənzərsiz təbiətindən həzz almaq üçün adaya gəlirlər, lakin turistlərin kütləvi axını ətraf mühitə zərərlidir.

İslandiya 2040-cı ilə qədər karbon neytral ölkə olmağı hədəfləyir, lakin bu məqsəd çoxlu sayda turistin ətraf mühitə yaratdığı mövcud gərginlik səbəbindən təhlükə altındadır.

İslandiyanın Baş naziri qeyd edib ki, yeni vergi dərəcəsi müzakirə olunur, lakin şərtlər bir qədər mülayim olacaq.

Bu vergi vasitəsilə toplanan vəsaitlər adanın unikal təbiətinin qorunması və bərpası layihələri üçün istifadə olunacaq, həmçinin yaşıl iqtisadiyyata investisiya kimi istifadə olunacaq.

Xatırladaq ki, iyunun sonunda İslandiya bu mövsüm açıq dənizlərdə kommersiya balina ovunu dayandırmışdı. Qərar, dəniz heyvanlarının tez-tez island dənizçilərinin əli ilə uzun və ağrılı ölümlərə məruz qaldığını göstərən ətraflı hesabatın dərcindən sonra verilib.

Lakin sentyabr ayında hökumət balina ovuna qoyulan qadağanın uzadılmayacağını açıqlamışdı. Eyni zamanda, İslandiya ovçuluğu daha humanistləşdirməli olan bir sıra yeni qaydalar irəli sürüb.

Aynil
Sfera.az