Bu sözləri Sfera.az-a açıqlamasında Azərbaycan Prezidenti İlham Əliyevin Moskvaya səfəri və burada rusiyalı həmkarı Vladimir Putinlə görüşünün bölgəmizdə hansı dəyişikliklərə rəvac verəcəyindən danışarkən politoloq Məhəmməd Əsədullazadə deyib.

"Azərbaycan Prezidenti İlham Əliyevin Moskvada rusiyalı həmkarı Vladimir Putinlə görüşü 11 noyabr və 10 yanvar üçtərəfli razılaşmalarından sonra reallaşan növbəti görüşdür. Bunu imza atılan öhdəliklərə əməl edilməsi və Ermənistanı öhdəlikləri yerinə yetirməyə vadar etməyə əsaslanan bir görüş kimi dəyərləndirərdim. Rusiya prosesdə vasitəçi olaraq İrəvan üzərində müəyyən təsir rıçaqlarına malikdir. Ermənistan əldə edilən razılaşmalardan bir neçə ay keçməsinə baxmayaraq sui-istifadə hallarına yol verərək, prosesi  manipulyasiya etməklə məşğuldur”, - deyə politoloq bildirib.

Həmsöhbətimiz yuxarıda deyilənlərə əsasən Moskva səfərinin müsbət nəticələr gətirəcəyinə ümid edir. Onun sözlərinə görə, bu səfər İrəvanın son zamanlar mütəmadi olaraq həyata keçirdiyi təxribatlara son qoyacaq: 

"Azərbaycan tərəfi konkret olaraq sərhədlərin delimitasiya və demarkasiyası, kommunikasiya xətlərinin açılması üzrə Ermənistanın üzərinə götürdüyü öhdəlikləri yerinə yetirməsi üçün danışıqlar aparıb. Hansı ki, bu danışıqlar da birbaşa Moskvadan həyata keçirilir. Bu mənada düşünürəm ki, Azərbaycan Prezidentinin Moskva səfəri və burada apardığı müzakirələr postmüharibə dövrü üçün təhlükəsizliyin təmini, nəqliyyat-kommunikasiya sisteminin açılması və regionda ümumi-iqtisadi əməkdaşlığı özündə ehtiva edir. Moskvada aparılan bu danışıqların ümumi nəticəsi müəyyən müddətdən sonra özünü göstərəcək. Bu səfər və görüş Ermənistanın son zamanlar mütəmadi olaraq birbaşa həyata keçirdiyi təxribat və atəşkəs rejimini pozmasının qarşısını almaqda mühüm rol oynayacaq”.