“Mikroavtobus və taksi sürücülərinin bir çoxu “patı” istifadəçiləridir” – Aslan İsmayılov
14:11 / 09.07.2021
1919
"Yollarda mikroavtobus və taksi sürücülərinin
törətdiyi yol nəqliyyat hadisələrinin bir neçə səbəbi var. Bunların arasında
kimlərə gəldi, sürücülük vəsiqələrinin verilməsi, acgöz işbazların pul
qazanmaq naminə bəzən heç sürücülük vəsiqələri olmayanlara da nəqliyyat
vasitələrini icarəyə vermələridir”.
Sfera.az bildirir ki, bunu tanınmış hüquqşünas
Aslan İsmayılov Bakı - Qazax yolundakı qəzadan
danışarkən deyib. Onun sözlərinə görə, səbəblər sırasında son vaxtlar tüğyan
edən narkotik vasitələrin geniş yayılması amili də var:
"Məndə olan məlumata görə, mikroavtobus və
taksi sürücülərinin bir çoxu məhz "şüşə”, "patı” kimi tanınan narkotik
vasitələrin istifadəçisi və satıcılarıdır. Bu sahədə Lənkəran və digər cənub
bölgəsindən Bakıya istiqamətlənən marşrutlarda işləyən sürücülərin adları
daha çox hallanır. Ona görə də məhz bu katqeqoriya insanlar xüsusi
yoxlamalara məruz qalmalıdırlar. İstənilən analizlə həmin şəxslərin narkotik
vasitə istifadəçisi olduqlarını yoxlamaq çox asandır”.
Xatırladaq ki, bu gün Bakı-Qazax yolunun Ucar
rayonunun Müsüslü kəndindən keçən hissəsində "Mercedes Vito" markalı
mikroavtobusla "Howo" markalı yük maşını toqquşub. Avtoqəza nəticəsində
5 nəfər ölüb, 2 nəfər xəsarət alıb.
