Bəzi evli cütlüklər anlaşa bilmədikləri üçün boşanma qərarı alırlar. Maraqlısı odur ki, kişilər boşandığı qadına yenidən maraq göstərir.

Bəs bu marağın səbəbi nədir?

Mövzu ilə bağlı Sfera.az-a danışan psixoloq Gülnar Orucova bildirib ki, boşanma olduqdan sonra, kişilər istədiyi şəxslə münasibət qura bilir.

“Lakin kişi ayrıldığı yoldaşına sanki hələ də öz yoldaşıymış kimi yanaşır. Onun kimləsə münasibət qurmasını normal qarşılamır. Hətta dəfələrlə xəbərlərdə oxumuşuq ki, kişi boşandığı qadını qısqanclıq zəminində qətlə yetirib. Bu isə dövrümüzün problemlərindən biridir. Ayrıldığı yoldaşını izləyən kişilərin də sayı az deyil. Heç kim ayrıldığı insanın həyatına müdaxilə etməməlidir. Kişilər öyrəşdikləri birindən bir müddət ayrı qalanda darıxmağa başlayırlar”.

Psixoloq qeyd edib ki, uzunmüddətli ayrılıq, cütlüklər arasında olan mənfiyönümlü hadisələri unutdurur.

“İnsanlar həmişə ayrıldıqları şəxslər ilə xoş günlərini xatırlayıb kədərlənir. Həmin xatirələr də özlüyündə darıxmaq hissini gətirir. Boşanma olduqdan sonra yenidən barışmaq isə uğurla nəticələnmir”.

Ülkər Abdurahmanlı