Maraqlıdır, Operativ Qərargah əslində KİV-lərlə necə işləməlidir?

Əvvəlcə, brifinqin nə olduğunu deyək. Brifinq - mətbuat nümayəndələrinin qısa yığıncağıdır. Burda xüsusi səlahiyyətli şəxs tərəfindən hökumətin, hər hansı partiyanın, təşkilatın və ya ayrıca siyasi xadimin müəyyən məsələ üzrə mövqeyi açıqlanır. Adətən, mətbuat konfransından fərqli olaraq, dəvət olunanların suallarına cavab verilmir. Bundan başqa, brifinq qapalı xarakter daşıyır, ona yalnız əvvəlcədən müəyyən edilmiş KİV nümayəndələri dəvət olunur.

Azərbaycan Jurnalistlər Birliyinin sədri Elçin Şıxlı mövzu ilə bağlı Sfera.az-a açıqlamasında xatırladıb ki, brifinqlər mətbuat konfranslarından fərqlənir:

"Brifinqdə suallar cavablandırılmır. Operativ Qərargah isə brifinqdən istifadə edir. Təbii ki, mətbuat konfransının keçirilməsi, sualların verilməsi daha yaxşı olardı. Amma nəsə belə bir yol seçiblər. Hələ yaxşı ki, brifinq keçirirlər. Bunu etməyə də bilərdilər”.

E.Şıxlı qeyd edib ki, məsələ ilə bağlı jurnalistlər həmrəy olmalıdırlar:

"Ya gərək jurnalistlər Operativ Qərargahdan hansısa bir şəkildə tələb edələr, ya da bu tələblərə cavab verilməyəndə jurnalist həmrəyliyi göstərələr. Məsələn, onların heç biri brifinqə getməzdilər. Amma bu, mümkün deyil. Bizdə həmrəylik müşahidə edilmir”.

Qeyd edək ki, Operativ Qərargahın sonuncu brifinqi dünən təşkil edilmişdi.