"Samsung" 4 dəfə qatlanan telefon üzərində işləyir
Cənubi Koreyanın texnologiya nəhəngi "Samsung" şirkəti qatlanan telefon bazarında yeni bir dəyişikliyə hazırlaşır. Şirkət dörd dəfə qatlana bilən yeni ekran layihəsini təqdim edib və buna patent alıb.
Sfera.az xəbər verir ki, bu ilin əvvəlində üç dəfə qatlanan telefon üzərində işlədiyini təsdiqləyən "Samsung", indi isə daha iddialı bir layihəyə imza atmaq niyyətindədir.
Yeni patent, planşet, noutbuk və smartfon arasında keçid edə bilən çoxfunksiyalı cihazın hazırlanmasına imkan verəcək.
Mütəxəssislərin fikrincə, bu cür texnologiya mobil cihazlarda həm məhsuldarlıq, həm də əyləncə sahəsində əhəmiyyətli dəyişikliklər yarada bilər. Dörd qatlanan ekran sayəsində istifadəçilər eyni anda bir neçə tətbiqi idarə edərək çoxlu vəzifə yerinə yetirmə imkanına malik olacaqlar.
Hazırda "Samsung", "Galaxy Z" Fold və Z Flip seriyaları ilə qatlanan telefon bazarında liderliyini qoruyur. Yeni patent isə şirkətin bu sahədəki innovativ yanaşmalarını davam etdirdiyini göstərir.
Bununla belə, mütəxəssislər qeyd edir ki, patentlər həmişə real məhsula çevrilmir. Lakin "Samsung"un bu ideyanı araşdırması mobil texnologiyanın gələcəyinə dair mühüm ipucları verir.
Bəsti Rəfizadə
