İkinci Qarabağ müharibəsi Azərbaycanın bütövləşməsi uğrunda canını qurban verən şəhidlərin hesabına qalibiyyətlə başa çatdı.

Qəhrəmanlarımızın xatirəsinin əziz tutulması və gələcək nəsillərin onları unutmaması üçün İkinci Qarabağ müharibəsi şəhidləri üçün abidə ucaldılması təklif edilir.

Mövzu ilə bağlı Sfera.az-a danışan deputat Naqif Həmzəyev İkinci Qarabağ müharibəsi şəhidlərinin xatirəsinə abidənin ucaldılması ilə bağlı məsələnin aidiyyətı komissiya tərəfindən artıq müzakirə edildiyini və bu barədə tezliklə mətbuata məlumatın veriləcəyini qeyd edib:

"Qarabağ müharibəsində Azərbaycan orsudu Ali Baş Komandanın rəhbərliyi ilə qalib oldu. Bu qələbənin əldə edilməsində şəhidlərimizin və qazilərimizin rolu böyükdür. Azərbaycan dövləti tərəfindən bütün şəhid ailələrinin, müharibə iştirakçılarının hər birinin sosial təminatı təşkil edilib. Bu gündən sonra da bu məsələ ən yüksək formada həll olunacaq.

Sizə də məlum olduğu kimi Milli Məclis tərəfindən Prezidentin də göstərişinə uyğun İkinci Qarabağ müharibəsində iştirak edənlər üçün medal və ordenlər təsis olundu. Şəhid ailələri isə yeni mənzillərlə təmin olunacaq.

Bundan başqa şəhidlərin xatirəsinə abidə ucaldılması məsələsi də aidiyyəti komissiya tərəfindən araşdırılır. Ən qısa müddətdə bu məsələ ilə bağlı mətbuata məlumat veriləcək. Şəhid və veteranlarla bağlı səslənənən bütün müsbət təklifləri dəstəkləyirik. Lakin yenə sadəcə dəstək olmaqla iş bitmir, təbii olaraq bu təkliflər öz həllini də tapmalıdır. Şəhidlərimizin xatirəsinə abidənin ucaldılması onların adlarına uyğun, ən yüksək səviyyədə təşkil olunmalıdır".

Deputat Elman Məmmədov isə təkcə Bakıda yox, bütün bölgələrdə Birinci və İkinci Qarabağ müharibəsi şəhidlərinin xatirəsinə abidə ucaldılmalı olduğunu bildirib:

"Hər birimiz üçün onların xatirəsi müqəddəsdir, əzizdir. İsət Birinci Qarabağ, istərsə də İkinci Qarabağ müharibəsi şəhidləri canlarını vətənin bütövləşməsi uğrunda qurban veriblər. Azərbaycanın ən müqəddəs, möhtəşəm yerində şəhidlərimizə abidə ucaldılmalıdır. Eyni zamanda şəhidlər üçün öz doğma yurdalarında, yəni doğulduqları bölgədə də ümumi abidə qoyulmalıdır. Bu insanlar şəhidlik zirvəsinə Azərbaycan xalqının qürurla yaşaması üçün ucalıblar. Onlar bizim üzərimizdən məğlub sözünü götürüblər. Buna görə də onlar üçün nə lazımdırsa ən yüksək səviyyədə təşkil edilməlidir. Həmin şəhidlərin ailələrinə hər zaman özümüzü borclu hiss edəcəyik".

Sfera.az

Əzizə Zeynal