Dünya çempionatı: Səmədov finalda, 3 bürünc şansı

Bu gün İspaniyanın Pontevedra şəhərində güləş üzrə U-20 dünya çempionatı start götürüb.

Sfera.az xəbər verir ki, yarışın ilk günündə yunan-Roma güləşçiləri mübarizəyə qoşulublar.

5 pəhləvanımız xalça üzərinə çıxıb.

U-20 dünya çempionatı
Yunan-Roma güləş

5️5 kq
Təsnifat mərhələsi
Rahim Həsənov ilk görüşdə çexiyalı Filip Bartoşiki sınağa çəkib. 8:0 hesabı ilə qalib gələn güləşçimiz Hassan Mohammed Alharthi ilə görüşdə də çətinlik çəkməyib - 11:1. Rahim 1/4 finalda Ali Abdullah Ahmadi Vafaya uduzub (1:6). Onun rəqibi finala yüksəldiyindən Həsənov bürünc şansını saxlayıb.

6️3 kq
Təsnifat mərhələsi
Məhəmməd Şükürzadə ilk olaraq bolqarıstanlı Hristo Valentinovdan üstün olub (7:0). 1/8 finalda çinli Jiyu Vanqı çətinliklə qalib gələn (2:1) təmsilçimiz uğurunu 1/4 finalda davam etdirə bilməyib. O, Erzu Zakriyevə (AİN) 4:9 hesabı ilə uduzub. Zakriyev həlledici görüşə vəsiqə qazandığından Məhəmmədin medal şansı qalıb.

77 kq
Təsnifat mərhələsi
Təsnifat mərhələsindən mübarizəyə qoşulan Davud Məmmədov moldovalı Aleksandru Soloveu ilə üz-üzə gəlib və 0:8 hesabı ilə mübarizəni dayandırıb.

87 kq
1/8 final
Cocu Səmədov mübarizəyə 1/8 finaldan start verib. O, əvvəlcə serbiyalı Andriya Mihayloviçi (5:1), sonra ermənistanlı Ruben Gevorgyanı (3:1) məğlub edib. Səmədov yarımfinalda Temirlan Turdakinlə (Qazaxıstan) qarşılaşıb. Rəqibinə 4:2 hesabı ilə qalib gələn idmançımız həlledici döyüşə vəsiqə qazanıb. Finalda onun rəqibi Asan Janişov (Qırğızıstan) olacaq.

130 kq
1/8 final
Məzaim Mərdənov ilk görüşdə Marko Supiçə (Serbiya) 2:0 hesabı ilə qalib gəlib. Təmsilçimiz növbəti cəhddə uğursuz olub. O, iranlı Abolfazi Qulamhüseyn Fathitazangiyə uduzub. Məzaimin rəqibi finala vəsiqə qazandığından güləşçimiz medal uğrunda yarışacaq.

Qeyd edək ki, Azərbaycan yığması mundialda 25 idmançı ilə təmsil olunacaq. Dünya çempionatına sentyabrın 8-də yekun vurulacaq.

İdman.biz