Sfera.az bildirir ki, hələ ki az ölkədə rast gəlinən, lakin daha çox mutasiyaya uğrayan "Nu” variantı elm adamlarının ciddi narahatlığına səbəb olub. Bu baxımdan yoluxmaların qeydə alındığı ölkələr qırmızı siyahıya alınıb, sərhədlərin bağlanması istiqamətində addımlar atılıb. 

Belə ki, İngiltərənin Sağlamlıq Agentliyi "Nu” variantı üçün "İndiyə qədər izlədiyimiz ən təhlükəli növlərdən biridir. "Delta” ştammından da böyük narahatlıq yaradır və dünyada yeni koronavirus dalğalarına səbəb ola bilər”, - deyə bildirib.

Böyük Britaniya yeni növün ölkəyə girişini əngəlləmək üçün Cənubi Afrikadan olan uçuşları dayandırmaq qərarına gəlib.  "The Times” qəzetində Birləşmiş Krallığın səhiyyə naziri Sajid Cavidin Botsvana, Namibya, Zimbabve, Lesotho və Esvatini ölkələri ilə birlikdə Cənubi Afrikanı qırmızı siyahıya almağa hazırlaşdığı yazılıb. Sözügedən yerlərə səyahət etmək qadağası gündəmdə ikən, həmçinin ölkəyə hər gün Cənubi Afrikadan 500-700 nəfər arası insanın giriş etdiyi də açıqlanıb.

Qeyd edək ki, ötən gün elm adamları Afrikada yeni varianta rast gəlindiyini açıqlayıblar. Botsvanada müəyyən edilən ştamma B.1.1.529 kodu ilə tanınan "Nu” adı verilib. Mütəxəssislər sözügedən variantın tərkibində 32 fərqli mutasiyanın olduğunu bildiriblər. Yeni ştammın koronavirus əleyhinə olan peyvəndlərə qarşı daha müqavimətli ola biləcəyi qeyd edilib.