"Gürcüstan parlamenti ölkə prezidenti Salome Zurabişvilinin xarici agentlər haqqında qanuna vetosunu ləğv edəcək".

Sfera.az TASS-a istinadən xəbər verir ki, bu fikri Gürcüstan parlamentinin sədri Şalva Papuaşvili bildirib .

Məsələyə mayın 28-i baxılması planlaşdırılır. Papuaşvilinin sözlərinə görə, siyasi bəyanatlar iclasın başlanmasından sonra iki-üç saat çəkəcək, bundan sonra parlament dərhal prezidentin "xarici agentlər haqqında qanun"a vetosunun aradan qaldırılmasını müzakirə edəcək.

“Düşünürəm ki, proses sabah başa çatacaq və təbii ki, parlament bu vetonu mütləq ləğv edəcək”, - Papuaşvili bildirib.

Mayın 14-də Gürcüstan parlamenti "xarici agentlər haqqında qanun"u üçüncü oxunuşda qəbul edib:84 deputat lehinə, 30 deputat əleyhinə səs verib.

Gürcüstan prezidenti Salome Zurabişvili "xarici agentlər haqqında" qəbul edilmiş qanunu imzalamaqdan imtina edib. Bununla belə, parlament səs çoxluğu ilə vetonu ləğv edə bilər.

Bütün ölkədə qanun layihəsinin müzakirəsi son dərəcə qalmaqallı olub və etiraz aksiyaları ilə müşayiət olunub. Bundan əlavə, bir çox Qərb liderləri açıq şəkildə qanundan narazılıqlarını ifadə edərək, Gürcüstanı müxtəlif nəticələr və sanksiyalarla hədələyiblər.

Əzizə

Sfera.az