Gürcüstan parlamentində “Xarici agentlər haqqında qanun”un müzakirəsi zamanı səs-küylü insident yaşanıb. 

Sfera.az bildirir ki, Gürcüstan parlamentinin hüquq komitəsinin iclası zamanı “Vətəndaşlar” partiyasının rəhbəri Aleko Elisaşvili parlament çoxluğunu təmsil edən “Gürcü arzusu” partiyasından olan Mamuka Mdinaradze ilə dava edib. 

Mdinaradze Anna Natsvlişvili (Lelo partiyası) ilə mübahisə edib. Bu zaman Elisaşvili podiumun arxasında dayanan Mdinaradzeyə yaxınlaşaraq, onun üzünə yumruq zərbəsi endirib. Hadisədən sonra hər iki deputat iclas zalını tərk edib. Jurnalistlərin sözlərinə görə, dava dəhlizdə davam edib. Daha sonra Aleko Elisaşvili parlament binasını tərk edib.

Davadan sonra deputatın özünün dediyinə görə, o, binadan çıxarılıb. O, bildirib ki, həmişə bir insan kimi “Gürcü arzusu” ilə ünsiyyət qurmağa çalışıb. 

“Biz onları “Rusiya qanunları” ilə birlikdə çölə atmalıyıq, bütün bunlardan bezmişəm. Mən bu rus agenti Mdinaradzenin üzünə yumruq vurmuşam”- deyə Elisaşvili bildirib.

Yarım saat sonra hüquq komitəsinin iclası davam etdirilib. Təşkilatın sədri Anri Oxanaşvili müxalifətçiləri və hüquq müdafiəçilərini “bu rəzil davranışa qiymət verməyə” çağırıb.

Öz növbəsində Mamuka Mdinaradze də fikrini bildirib. Onun sözlərinə görə, Elisaşvili onun üstünə oğru kimi gizlin gələrək vurub.

Qeyd edək ki, insident Gürcüstan parlamentinin Rusiya Federasiyasında qüvvədə olan “Xarici təsirin şəffaflığı haqqında” qanun layihəsinin müzakirəsi zamanı yaşanıb. Qanunun əleyhdarları axşam saatlarında parlament binası yaxınlığında “Avropaya bəli, Rusiya qanunlarına yox!” şüarı ilə etiraz aksiyası keçirməyi planlaşdırıblar.

Xatırladaq ki, ötən ilin yazında parlamentdə xarici agentlər haqqında qanun qəbul edildikdən sonra da Tbilisi sakinləri küçələrə axışmışdı. Aksiya hüquq-mühafizə orqanlarının əməkdaşları ilə toqquşma ilə başa çatmış, 66 etirazçı saxlanılmışdı.

Gürcüstanda “xarici agentlər haqqında” qanun layihəsinə görə insanlar kütləvi şəkildə küçələrə çıxmağa başlayıb.

Gürcüstanın böyük şəhərlərində insanlar 2023-cü ilin martında olduğu kimi mitinqlərə başlayıb. Onlar hakimiyyətdən Rusiyadakı qanunlarla eyni qanunları qəbul etməməyi tələb edirlər. Polis parlament binasını mühasirəyə alıb. 14 nəfər saxlanılıb

Aysel

Sfera.az