Böyük Britaniyadan olan siyasətçi və iş adamı Maykl Eşkroft Rusiyaya qarşı müharibədə Ukraynanın çətin vəziyyətlə üzləşdiyini düşünür.

Sfera.az xəbər verir ki, bir neçə dəfə Ukraynaya səfər edən, burada yerli əhali və ictimai xadimlərlə görüşən Eşkroft öz qənaətini “The Telegraph”da dərc edilən məqaləsində bölüşüb.

Keçmiş britaniyalı siyasətçi hesab edir ki, Rusiya üzərində tam qələbənin əldə edilməsi üçün Ukrayna hökmən NATO-ya üzv olmalıdır, yaxud Ukrayna NATO silahları ilə tam təchiz edilməlidir. Onun fikrincə, əks halda müharibə uzun və yorucu olacaq ki, bu da ukraynalıları torpaq itkisi ilə barışmağa vadar edəcək:

“Əgər Qərb Kiyevin tezliklə alyansa qoşulmasının lazım olduğunu görməsə, Ukrayna qanlı dalana dirənəcək və nəticə daha da pis olacaq. Vladimir Putin və onun yaxınları tərəfindən səsləndirilən ən çox yayılmış yalanlardan biri budur ki, guya Rusiya faktiki olaraq NATO ilə müharibə aparır. Bu yalan Rusiya dövlətinin döyüşdə həlak olan əsgərin ailəsi qarşısında özünü müdafiə imkanlarını yaxşılaşdırır. Rusiyanın istifadə etdiyi yalanı həqiqətə çevirmək lazımdır. Ukrayna çox təəssüf ki, NATO üzvü deyil, baxmayaraq ki, o, Sovet İttifaqının dağılmasından üç il sonra, 1994-cü ildən bəri NATO-nun “tərəfdaşıdır”. Əgər o, NATO-nun tam üzvü olsaydı, Rusiya çətin ki, Ukraynanı işğal etməyə çalışardı”.

Eşkroft Ukraynanın baş komandanına istinadən qeyd edib ki, müharibə artıq dalana dirənib: “Bu ayın əvvəlində baş komandan, general Valeri Zalujnıy 21-ci ayını tamamlayan müharibəyə real qiymət verib. O, münaqişənin bir qədər dalana dirəndiyini və “statik döyüş” mərhələsinə doğru irəlilədiyini iddia edib.

İndi nə etmək lazımdır?

Mən müharibə başlayandan bəri Ukraynaya beş dəfə səfər etmişəm. Səfər zamanı vaxtımın çoxunu cəbhə xəttinə yaxın şəhər və qəsəbələrdə keçirmişəm, çoxlu ukraynalıların, hərbi komandirlərin və mülki şəxslərin fikirlərini dinləmişəm. Ukraynalıların arzusu odur ki, Qərb, xüsusən də ABŞ onlara qalib gəlmək üçün “F-16” qırıcıları və digər yüksək texnologiyalı silahlar versin.

Vəziyyət göstərir ki, mövcud şərtlərlə ukraynalılar uzun müddət müqavimət göstərə bilməyəcək. Ukraynalılar tərəfindən danışılan iki bədbin ssenari var. Birinci ssenariyə görə, Ukrayna Rusiyanın işğal etdiyi ərazilərin bir hissəsindən imtina edərək kapitulyasiyanı qəbul edirlər. Bu variantda daha çox insanın həyatını xilas etmək mümkün olur. Ukraynalıları daha az cəlb edən ikinci ssenari müharibənin on il və ya daha çox davam etməsidir. Onların fikrincə, uzun müddət davam edəcək müharibə Rusiyanın xeyrinə olacaq. Çünki uzun müddət davam edən müharibə Ukrayna əhalisinin daha çox azalmasına səbəb olacaq. 2014-cü ildə münaqişə başlayanda Rusiyanın 148 milyon, Ukraynanın 44 milyon əhalisi var idi. Hazırda Ukrayna əhalisi 40 milyona enib.

Beləliklə, uzun sürən müharibədə daha çox canlı qüvvə tələb edir ki, bu da Rusiyaya yavaş-yavaş üstünlük əldə etməyə imkan verəcək. 

Buna görə də üçüncü variant nəzərdən keçirilməlidir. Qərb Ukraynanı hərbi cəhətdən daha böyük qüvvə ilə dəstəkləməlidir. Bunun üçün Ukrayna NATO üzvlüyünə qəbul edilməlidir. Bu ilin iyulunda NATO razılaşdı ki, Ukraynan Üzvlük Fəaliyyət Planı prosesini tamamlamaq məcburiyyətində deyil. Bu o deməkdir ki, Ukraynanın üzvlük yolu “bir addımlıq proses” olacaq, yəni müttəfiqlər razılaşdıqda Ukrayna NATO-ya qısa müddətdə üzv olacaq”.

Vasif