Hindistanın Kerala ştatında təhlükəli Nipah virusunun yayılması qeydə alınıb.

Ümumdünya Səhiyyə Təşkilatının hesablamalarına görə, epidemiyası Hindistanda qeydə alınan Nipah virusundan ölüm nisbəti 40-75% arasında dəyişir. Ancaq təəssüf ki, hələ də bu infeksiyaya qarşı peyvənd yoxdur.

Sfera.az xəbər verir ki, sentyabrın 12-nə olan məlumata görə, Hindistanda artıq iki nəfər ölüb, ən azı beş nəfər virusa yoluxub. Eyni zamanda, xəstələrlə təmasda olan 950 nəfər artıq müəyyən edilib ki, onlardan 213-ü yüksək risk qrupuna aiddir.

Hindistanın Səhiyyə naziri Mansukh Mandaviya Hindistanın “Press Trust of India” xəbər agentliyinə verdiyi açıqlamasında: 

 "Kerala ştatının Kojikode rayonunda iki ölüm faktı qeydə alınıb, bunlara Nipah virusu səbəb olub. Vəziyyəti təhlil etmək və əyalət hökumətinə kömək etmək üçün ora ekspertlər qrupu göndərilib"-deyə bildirib.

Nəşrin məlumatına görə, zərər çəkmiş ərazidə məktəblər bağlanıb, bir neçə kənd təhlükəli zona elan edilib. Dövlət Səhiyyə naziri Vina George, 24 yaşlı tibb işçisi olan beşinci yoluxmuş şəxsin olduğunu təsdiqləyib. Həmçinin, hökumət mediasının məlumatına görə, virusa yoluxmuş 9 yaşlı uşaq süni nəfəs aparatındadır. Bununla belə, artıq sentyabrın 15-də səhər saatlarında daha bir nəfər ölüb və xəstələrin sayı artıb. 

Səlahiyyətlilər insanları panikaya düşməməyə, bu vəziyyətə ehtiyatla yanaşmağa çağırır. Rəsmilər isteriya üçün heç bir səbəb olmadığına inandırır, çünki ölülərlə yaxın təmasda olan hər kəs təcrid olunmuş və xəstəxanalardadır. Bununla belə, əyalət hökuməti vətəndaşlara ehtiyat tədbiri olaraq çöldə maska ​​taxmağı tövsiyə edir.

Nipah virusu: 

Nipah virusu (NiV) ilk dəfə 1998-ci ildə Malayziyada aşkar edilib. O vaxtdan bəri Asiyada vaxtaşırı xəstəliyin yayılması baş verir. İnfeksiya beynin iltihabına və ağır tənəffüs əlamətlərinə səbəb olur. Hələlik virusa qarşı peyvənd yoxdur, buna görə də 70% hallarda xəstəlik ölümlə nəticələnir. Əvvəllər Keralada Nipah virusundan ölüm halları 2018 və 2021-ci illərdə qeydə alınıb, lakin bu virusun diaqnozu o qədər də mükəmməl deyil. PCR testləri əsasən Nipah virus infeksiyasını təyin etmək üçün istifadə olunur.

Hindistan mediasının məlumatına görə, Pune şəhərindəki ICMR Milli Virusologiya İnstitutu (NIV) infeksiya yerində virusa dair nümunələri yoxlamaq üçün mobil BSL-3 laboratoriyasını Kozhikodeyə göndərib. Hindistan Tibbi Tədqiqatlar Şurasının (ICMR) məlumatına görə, antiviral dərman (monoklonal antikor) hələ ki, effektivliyi klinik cəhətdən sübut olunmasa da, hökumət üçün mövcud olan yeganə müalicə variantıdır.

Xəstəliyin uçan tülkü adlanan iri yarasalar olan meyvə yarasaları tərəfindən yayıldığı güman edilir. Onlar meyvələrlə, xüsusən manqo, banan, şirin xurma şirəsi ilə qidalanırlar. Yarasaların çirklənmiş tüpürcəkləri meyvələrin daxilinə nüfuz edə bilir. Ümumdünya Səhiyyə Təşkilatının məlumatına görə, bu yarasalar Nipah virusunun təbii daşıyıcılarıdır. Virus heyvanlardan insanlara və ya insandan insana təmas yolu ilə keçə bilər. Ev heyvanları, o cümlədən atlar, pişiklər, itlər də yoluxa və infeksiya yaya bilər. Xüsusilə virus donuzlar arasında yüksək yoluxucu hesab olunur bu virusu insanlara ötürə bilər. Bundan əlavə, ölümcül infeksiya yoluxmuş şəxsdən bədən ifrazatları vasitəsilə ötürülə bilər.

Xəstəliyin simptomları müxtəlifdir: daha yüngül olanlara qızdırma və baş ağrısı, qusma, boğaz və əzələ ağrıları daxildir. Xəstəlik şiddətli olduqda, xəstə ensefalit və tənəffüs problemləri, epilepsiya kimi kəskin tutulmalarla qarşılaşa bilər, bu da şəxsiyyət dəyişikliklərinə və ya komaya səbəb ola bilər. Nipah virusunu müalicə etmək üçün hələlik xüsusi bir dərman yoxdur. ÜST və Xəstəliklərə Nəzarət və Qarşısının Alınması Mərkəzlərinə görə əsas müalicə simptomları idarə etmək və insanın mümkün qədər istirahət etməsini və maye qəbulunu təmin etməkdir.

Xatırladaq ki, Parisdə də “dang” virusu daşıyan həşəratların məhv edilməsinə başlanılıb. Bundan əlavə, araşdırmaçılar tədqiqat laboratoriyalarından sızma nəticəsində təhlükəli xəstəliklərin planetə yayıldığı halları araşdırıb. Məlum olanlar arasında qarayara sporlarının yayılması və qlobal COVID-19 epidemiyası var.

Aynil

Sfera.az