Bu gün Azərbaycanda Məhərrəm ayının ən önəmli günlərindən biri, Aşura günü qeyd olunur.

Hicri təqvimə əsasən, Aşura İmam Hüseynin və Kərbəla şəhidlərinin anım günüdür və bu gün bütün İslam dünyasında hüzn və mərhəmət simvolu kimi yad edilir. Azərbaycanda bu gündə qanvermə aksiyaları bir ənənə halını alıb. İnsanlar İmam Hüseynin fədakarlığını yad etmək üçün öz həyatlarını təhlükəyə atmadan, insanlara həyat vermək üçün könüllü olaraq qan verirlər. Qanvermə təkcə bir dini və ya humanitar akt deyil, eyni zamanda sağlamlıq üçün də faydalı bir addımdır. Bununla yanaşı, qan vermək hər kəs üçün uyğun deyil – bəzi şəxslər üçün tibbi əks göstərişlər mövcuddur.

Sfera.az xəbər verir ki, hazırda ölkənin müxtəlif məscidlərində, ibadət ocaqlarında və qan banklarında qanvermə aksiyaları təşkil olunub. Səhiyyə Nazirliyi və Qafqaz Müsəlmanları İdarəsi də aksiyalara dəstək verir. Aksiyanın məqsədi ehtiyacı olan xəstələrə yardım göstərmək, eyni zamanda cəmiyyətə xeyirxahlıq mesajı çatdırmaqdır. Qan verməyin bir sıra sağlamlıq baxımından üstünlükləri var. Mütəmadi olaraq qan verən insanlarda ürək-damar xəstəliklərinin riski azalır. Orqanizmdə dəmir səviyyəsi tənzimlənir və qan yenilənir. Bu proses bədəndə yeni qan hüceyrələrinin istehsalını stimullaşdırır.

Qan həcminin azalması təzyiqin tənzimlənməsinə də müsbət təsir göstərə bilər. Bundan əlavə, qanvermə insana psixoloji rahatlıq verir. İnsan xeyirxah bir iş görməkdən dolayı mənəvi olaraq özünü daha yaxşı hiss edir. Qan verən şəxs həm də müayinədən keçmiş olur və bəzi gizli xəstəliklər vaxtında aşkarlana bilir. Lakin qan vermək üçün hər kəs uyğun deyil. Əgər şəxs 18 yaşından aşağı və ya 60 yaşından yuxarıdırsa, ona qan vermək tövsiyə olunmur. Eyni zamanda, ürək xəstəliyi, şəkərli diabet, yüksək təzyiq kimi xroniki xəstəlikləri olanlar da qan verməməlidir.

Hamilə və ya süd verən qadınların, yoluxucu xəstəlik daşıyıcılarının, zəif bədən çəkisinə malik olanların, yuxusuz və ac insanların qan verməsi də məqsədəuyğun sayılmır. Son günlərdə peyvənd olunmuş və ya cərrahiyyə əməliyyatı keçirmiş şəxslər də həkimlə məsləhətləşmədən belə aksiyalarda iştirak etməməlidir. Səhiyyə qurumları və Qan Bankı bildirir ki, qan verməzdən öncə hər bir şəxs tibbi baxışdan keçirilməli, yalnız uyğun göstəricilər əsasında donor kimi qəbul olunmalıdır. Bu, həm donorun, həm də qan alacaq şəxsin təhlükəsizliyi üçün vacibdir.

Firuzə Əliyeva

Sfera.az

Aşurada kimlər qan verə bilməz?