Bu gün \"Qarabağ\" \"Neftçi\" ilə qarşılaşacaq

Sfera.az xəbər verir ki, günün ilk matçında "Zirə" "Sabah"ı qəbul edəcək.

Meydan sahibləri ilk iki matçda 4 xal toplayıbsa, "Sabah"ın 3 xalı var. Komandalar çempionatda 7 dəfə üz-üzə gəlib. Bunların ikisində "Zirə", üçündə isə qonaqlar qələbə qazanıb. Topların fərqi isə bərabərdir - 7:7. "Zirə” rəqibinə qarşı son 4 oyunda meydanı qolsuz və xalsız tərk etməyib.

Günün əsas matçında Azərbaycan derbisi gerçəkləşəcək. Son ölkə çempionu "Qarabağ" "Neftçi"ni qəbul edəcək. Bu, komandaların çempionatda 80-ci dueli olacaq. 29 görüşdə Ağdam təmsilçisi, 20-də isə flaqman meydanı 3 xalla tərk edib. 30 qarşılaşmada isə qalib müəyyənləşməyib. Topların fərqində də "Qarabağ"ın üstünlüyü var - 84:71. Ağdam klubu son üç Premyer Liqa matçında "Neftçi"dən qol buraxmır, paytaxt təmsilçisi isə 5 matçdır rəqibini məğlub edə bilmir.

Azərbaycan Premyer Liqası

III tur

20 sentyabr (bazar)

18:00. "Zirə”– "Sabah”

Hakimlər: İnqilab Məmmədov, Namiq Hüseynov, Nahid Əliyev, Nicat İsmayıllı

Hakim-inspektor: Feyzulla Feyzullayev

AFFA nümayəndəsi: Eldəniz Musayev

Zirə İdman Kompleksinin stadionu

20:15. "Qarabağ” – "Neftçi”

Hakimlər: Əliyar Ağayev, Zeynal Zeynalov, Akif Əmirəli, Rauf Cabarov

Hakim-inspektor: Ömər Paşayev

AFFA nümayəndəsi: Ramiz Mustafayev

"Azersun Arena”

Qeyd edək ki, turun digər matçında "Sumqayıt" evdə "Səbail"i 2:1 hesabı ilə üstələyib, "Qəbələ" - "Keşlə" matçında qol vurulmayıb.