Hələlik tarixi məlum olmayan görüşlə bağlı fikirlərini Sfera.az-a açıqlayan politoloq Qabil Hüseynli bildirdi ki, bu görüş İrəvanın arzuladığı taktikanı pozacaq:

"Görüşdə yəqin ki, Ermənistan Azərbaycan münasibətlərinin bütün kompleksinə toxunulacaq. Həm 10 noyabr üçtərəfli razılaşmasının necə yerinə yetirildiyi müzakirə ediləcək, həm də son zamanlar iki dövlətin sərhədində baş verən insidentlər, xüsusən də Ermənistanın atəşkəsin pozulması ilə müşayiət olunan təxribatları müzakirə predmeti olacaq”. 

Həmsöhbətimiz düşünür ki, bu müzakirələr nəticəsində hansısa bir ortaq məxrəcə gəlmək mümkün olacaq: 

"Hazırda isə vəziyyət daha da gərginləşməkdə davam edir. İrəvan məsələni mümkün qədər beynəlmiləlləşdirmək, dünyanın probleminə çevirmək və prosesə digər dövlətləri də cəlb etməyə çalışır. Bu məqsədlə də aranı qızışdırırlar. Moskvanı isə İrəvanın bu hərəkəti, onun digər dövlətləri də prosesə cəlb etmək cəhdləri narahat edir. Ona görə Rusiya da prosesin öz nəzarətindən kənara çıxmasına yol  verməmək üçün növbəti üçtərəfli görüşdə maraqlıdır”. 

Q.Hüseynlinin fikrincə, həmin görüşdə Ermənistanın Fransa və digər başqa ölkələrin də bölgəyə cəlb edilməsi istəyinə son qoyula bilər: 

"Bu görüş hər halda İrəvanın düşündüyü taktikanı pozacaq. Görüşdə həmçinin, sülh müqaviləsinin bir çox aspektləri də müzakirə edilə bilər”.