Sosial şəbəkələrdə Goranboy rayon sakini Verdiyev Arzu Vəli oğlunun prezidentə videomüraciəti yayılıb. Həmin şəxs mayın 14-də Goranboy Rayon İcra Hakimiyyətinin başçısının qəbuluna getdiyini, bu vaxt başçının birinci müavini tərəfindən döyüldüyünü və pəncərədən atıldığını bildirir.

Goranboy sakini deyir ki, o, Prezident İlham Əliyevin Azərbaycanda ictimai nəzarətin zəif olması barədə çıxışından ruhlanaraq, Goranboy rayonunda baş verən qanunsuzluqlarla bağlı faktları ictimailəşdirib. Amma bunun əvəzində Rayon İcra Hakimiyyətində döyülüb.

"Dünən başçının qəbul günü idi. Mən də qərara aldım ki, Musayev Eldarla (yerli sakin) başçının qəbuluna gedim. İcra başçısının qəbuluna yaxınlaşdım, orada xeyli adam vardı, təxminən 40-50 nəfər...

İcra başçısının birinci müavini Ceyhun Həsənov bizi görüb çağırdı, qəbul edib dərdimizi dinləyəcəyini dedi. İçəri keçdikdən sonra bizim hərəmizi bir otağa saldı. Mənimlə kobud rəftar etdi, söydü, döydü, başımı pəncərəyə, divara vurdu.

Sonra məni pəncərədən atdı. Bunun nəticəsi olaraq əlimdə, başımda kəsiklər əmələ gəldi. İcra Hakimiyyətinin iki sürücüsü də mənə kömək etmək əvəzinə söydü, təhqir etdilər.

Deyilənə görə, biri Ceyhun Həsənovun bacısı oğludur. Yenidən məni pəncərədən içəri ataraq, hadisəni ört-basdır etməyə çalışdılar. Amma mən imkan tapıb qaça bildim və yaxınlıqdakı DTX rayon şöbəsinə sığındım. Sağ olsunlar, orada mənə yardım etdilər, təcili yardım çağırdılar, yaralarımı sarıdılar…”

Onunla birlikdə torpaq və örüş yeri məsələsi ilə bağlı şikayətini çatdırmaq üçün qəbula gedən Eldar adlı şəxs də videomüraciətdə təsdiq edir ki, icra başçısının müavini C.Həsənov A.Verdiyevin qolundan tutaraq içəri salıb. Ona isə təpiklə zərbə vurub.

Sakinin bildirdiyinə görə, onu İcra Hakimiyyətinin arxa tərəfindən içəri salıblar, zalın yanındakı otaqda, şikayətə gələnlərin yanında Ceyhun Musayev onu hədələyib və "səninlə sonra danışacam” deyib.

Ürək xəstəsi olan Eldar Musayev deyir ki, o, İcra Hakimiyyətindən çıxaraq DİN-in "102” xidmətinə zəng vurub, icra başçısının müavini tərəfindən döyüldüyünü bildirib. Polislər gəlib və onu maşınla evinə çatdırıb. Evdə E.Musayevin vəziyyəti pisləşib və o, xəstəxanaya müraciət edib.

Daha sonra ona xəstəxanada tibbi yardım göstəriblər. Polislər də xəstəxanada şikayətçinin ifadəsini alıb.

Sonda A.Verdiyev deyir ki, Ceyhun Həsənov Goranboyda oliqarxdır, çoxlu biznes obyektləri var və vəzifəsindən istifadə edib biznesinə himayədarlıq edir. 

"Xahiş edirəm, onun barəsində tədbir görəsiniz”,- deyə sakin prezidentə müraciətini yekunlaşdırıb.