Aslan İsmayılov güneyli soydaşlarımıza səsləndi: \"Biz azərbaycanlıların haqlı olaraq sizlərdən gözləntimiz...\"

 

Sfera.az bildirir ki, bunu tanınmış hüquqşünas Aslan İsmayılov Ermənistana gedən iritonnajlı maşınların Azərbaycan sərhədində qalmasından və güney azərbaycanlı sürücülərin buna etirazından danışarkən deyib.

 

O, həmin sürücülərin hərəkətinə görə, peşmanlıq hissi keçiridiyini vurğulayıb:

"Hesab edirdim ki, yenidən müharibə revanşına hazırlaşan Ermənistana İran dövlətinin hərtərəfli yardım etməsi cənublu doğmalarımızda etiraz doğuracaq. İndi əksini gördüm. Bu haqsızlıqda heç bir azərbaycanlı iştirak etməməlidir, əksinə, bizə düşmən kəsilən Ermənistana İran dövlətinin istənilən yardımına öz etirazını bildirməlidir. 

Hamı bilməlidir ki, uzun illər torpaqlarımızı işğal altında saxlayan, faktiki blokadada qalan Ermənistanın bir nömrəli dəstəkçisi İran dövləti oldu. Bu illər ərzində xristrian ölkələri olan Gürcüstan, Ukrayna və digərləri bizim haqlı tələbimizin yanında olsa da, özünü müsəlman dövləti adlandıran İran məscidlərimizi darmadağın edən, orada donuz saxlayan Ermənistana bir dəfə etirazını bildirmədi, əksinə, hərtərəfli, o cümlədən hərbi yardım göstərdi”.

Hüquqşünas güneyli soydaşlarımıza da müraciət edib:

"Məhz sizə görə Azərbaycan hakimiyyəti ABŞ və Avropanın təzyiqlərinə baxmayaraq, heç vaxt İrana qarşı olan bir tədbirə qoşulmadı. İndi biz azərbaycanlıların haqlı olaraq sizlərdən gözləntimiz bizə qarşı riyakarlıq edən İran hakimiyyətinə Azərbaycana yönəlmiş növbəti aqressiyaya hazırlaşan Ermənistana göstərdiyi yardımlara öz etirazınızı bildirməyinizdir. Məhz sizin tərəfinizdən TIR sürücülərindən tutmuş Ermənistan adlı işğalçı, cinayətkar bir dövlətə yardım edən, onunla işbirliyində olan hər kəs ictimai tənqidlə üzləşməlidir”.