Tovuz rayonunda baş vermiş dəhşətli cinayətin bütün detalları ilə bağlı mötəbər mənbədən şok faktlar yayılıb.

Sfera.az xəbər verir ki, TVPress-in əldə etdiyi məlumatlarda Azərbaycan tarixinin ən dəhşətli seksual manyakının tam psixoportreti və etirafı, eləcə də polisin uşağı və qatili tapa bilməməsinin səbəblərinə aydınlıq gətirilir.

İ.Süleymanovun əmisi oğlu polis işçisidir və Nərminin axtarışı ilə bağlı yaradılan qrupa o da daxil edilib. İtən azyaşlı qızla bağlı kənddə axtarışlar aparılarkən və evlər yoxlanarkən sözügedən polis İ.Süleymanovun evinin yoxlanılmasına mane olub. Bildirib ki, əmisi və əmisi arvadı yaşlı adamlardır, oğlanları isə Moskva Dövlət Universitetini bitirən alim-ziyalıdır. Axtarış qrupunun rəhbəri də ona inanaraq, evdə axtarış aparılmasından imtina edib.

İ.Süleymanov yanğını ilk görməsini elə polis əmisi oğluna danışıb. Deyib ki, "şübhəli iy” hiss etdiyi üçün yaxınlaşıb və Nərminin cəsədinin yandığını müşahidə edib. Meyitin yandırılmasını ilk görən şəxs kimi İ.Süleymanov istintaqa cəlb edilib və bəlli olub ki, onun evində bu vaxta qədər axtarış aparılmayıb. Sanksiya verilib və ev axtarılarkən çardaqda qan izləri, həmçinin digər çoxsaylı maddi sübutlar aşkarlanıb.

Bundan sonra İ.Süleymanov qətli etiraf etmək məcburiyyətində qalıb və detalları danışıb. Bildirdiyinə görə, N.Quliyevanı əmisinin evindən çıxarkən görüb, aldadıb aparıb və meyvə qurusu adı ilə çardağa çıxarıb, sonra "xlorofil”lə yatırıb və əl-qolunu, ağzını yapışqanla bağlayıb. Ancaq qızcığazın təcavüzə məruz qalmadığı da bildirilir.

Nəhayət, manyak ələ keçəcəyi qorxusundan 10 yaşlı qızcığazın başına küt alətlə (daşla) vura-vura qətlə yetirib. Sonra isə meyiti yandırmaqla izi itirmək qərarına gəlib.

İ.Süleymanovun istintaqda "professor kimi” davrandığı, izi itirmək üçün soyuqqanlı şəkildə ifadə verdiyi də iddialar arasındadır. Ancaq bu "soyuqqanlı”, mədəni və savadlı imicli manyak peşəkar istintaqçıları aldatmağa nail olmayıb.

O, niyə meyiti basdırmadığı, yandırmağa qərar verməsinə də aydınlıq gətirib. Bildirib ki, polis itlərinin meyiti tapacağından və dəlil-sübut əldə edəcəyindən ehtiyat etdiyi üçün basdırmayıb və yandırıb.

Bəzi detallar istintaq sirri olduğu üçün yayımlanmır.
Qeyd edək ki, İ.Süleymanov subaydır və ali təhsillidir. M.V. Lomonosov adına Moskva Dövlət Universitetini bitirib. Bir müddət orada işləyib. 3 dil (Azərbaycan, rus və ingilis) bilir. Bundan sonra Bakıya qayıdaraq burada özəl sektorda çalışıb. 2000-ci ildə "Simurq M" televiziyasında işlədiyi deyilir. O, 7 ay qeyd olunan televizyanın xəbərlər deportamentində çalışıb. Son illərdə valideynləri ilə yaşayırdı. İ.Süleymanov Şərif Quliyevin (Nərminin atası) evindən 500 metr məsafədə yaşayırmış. İ.Süleymanov 10 ilə yaxın imiş özünə qapandığı üçün valideyinlərinin yanında Tovuzda Dondar Quşçu kəndində yaşayıb. Bir bacı və qardaşı var. Atası uzun illər kənddə fizika müəllimi işləyib. Kənddə hörməti olan şəxs olub və hazırda yataq xəstəsidir.

Bildirilir ki, bütün bu vaxt ərzində İlkin Nərmini kəndin ərazisində ailəsinə məxsus evdə gizlədirdi. İlkin törətdiyi əməllərin hamısını polisə detalları ilə nümayiş etdirib.  (baku.ws)