Növbədənkənar parlament seçkilərinin aktuallaşması siyasi qüvvələrin prosesdə hansı formatda qatılacağı məsələsini də aktuallaşdırıb. Seçkilərə qatılacaq partiyaların bir araya gələrək seçki blokları yaradıb, yaratmayacaqları da maraq doğuran nüanslardandır.

Sfera.az mövzunun aktuallığını nəzərə alaraq seçkilərə qatılacaqlarını bəyan edən siyasi partiyaların məsələyə mövqeyini öyrənib.

Böyük Quruluş Partiyasının başqanı, millət vəkili Fazil Mustafa əməkdaşımızla söhbətində növbəti parlment seçkilərində namizədliyini irəli sürəcəyini, ancaq bunu hansı formada reallaşdırmağı partiyadaxili müzakirələrdən sonra dəqiqləşdiriləcəyini bildirib : "Növbəti parlament seçkilərində namizədliyimi irəli sürəcəm. Ancaq hansı formada- bloklar formasında və ya ayrıca partiya olaraq namizədliyimi verəcəyimi müzakirələrdən sonra dəqiqləşdirəcəm”.

Azərbaycan Sosial Demokrat partiyasının sədri Araz Əlizadə seçki bloku yaratmağın qəti əleyhinə olduğunu, ümumiyyətlə bu məsələni düşünməyin tez olduğunu vurğulayıb:"Xeyr, seçki bloku yaratmağı qətiyyən düşünmürəm. Növbəti parlament seçkilərinə qatılıb- qatılmayacağımı Partiyanın Mərkəzi Komitəsi müəyyən edəcək. Hələ ki, parlament faktiki olaraq buraxılmayıb. Ona görə də, düzü, hələ bu haqda düşünməmişəm”.

Azərbaycan Demokrat Partiyasının sədri Sərdar Cəlaloğlu seçki bloku yaratmaq üçün müxalifətin gecikdiyini və ümumiyyətlə bunu gərəksiz bir addım kimi səciyyələndirib. Parlament seçkilərində namizədliyini irəli sürəcəyini bildirən Cəlaloğlu açıqlamasında bunları söyləyib: "Bəli, növbəti parlament seçkilərində namizdəliyimi irəli sürəcəm. Məncə, biz seçki bloku yaratmaq imkanlarını əldən vermişik. Çünki blok seçkidən bir neçə ay öncə yaradılmalı idi. Təəssüf ki, partiyalar siyasi olayları düzgün qiymətləndirə bilmədilər. Ona görə də, müəyyən dairələrlə sadəcə hansısa məsələdə razılaşmaq olar. Ancaq blok şəklində seçkiyə getmək həm texniki cəhətdən çətindir, həm də düşünürəm ki, buna ehtiyac da yoxdur.

Səbuhi

Sfera.az