Məlum olduğu kimi Müasir Müsavat Partiyası sentyabrın 22-nə mitinq təyin edib. Partiyadan bildirilib ki, mitinqin keçirilməsində məqsəd Azərbaycanda söz və sərbəst toplaşma azadlığının olmamasını iddia edərək ölkənin nüfuzuna xələl gətirən bəzi qüvvələrə etiraz bildirməkdir.

Həmin "bəzi şəxslər”in kimliyinə, eləcə də mitinqdə səsləndiriləcək şüarların məzmununa aydınlıq gətirmək məqsədilə əməkdaşımız Müasir Müsavat Partiyasının sədri Hafiz Hacıyevlə əlaqə saxlayıb.

Hafiz Hacıyev Sfera.az-a açıqlamasında bunları söyləyib: "Azərbaycanda dövlətimizə , xalqımıza qənim kəsilən, ölkəmizin beynəlxalq nüfuzuna zərbə vurmağa çalışan şəxs və qurumlara etirazımızı bildirəcəyik. Bunların kimliyi isə Azərbaycan xalqına bəllidir: Onlar vaxtilə Elçibəy hakimiyyətinin devrilməsində müstəsna xidmətləri olan Əli Kərimli və Milli Şuranın sədri Cəmil Həsənlidir. Adını çəkdiyim şəxslər hazırda ermənilərlə birgə Azərbaycan dövlətçiliyinə qarşı çox ciddi əks təbliğata başlayıblar”.

Hafiz Hacıyev iddia edir ki, Əli Kərimli və Cəmil Həsənli hazırda mühacir həyatı yaşayan Sevinc Osmanqızının yardımları ilə Vaşinqtonda Azərbaycan dövlətinin əleyhinə tədbirlər keçirirlər: "Xaricdə Azərbaycan dövlətçiliyinə, dövlət müstəqilliyimizə xələl gətirən ifadələr işlədilir, fikirlər söylənir, amma Dağlıq Qarabağın adı belə çəkilmir. Həm Azərbaycanın daxilində, həm də beynəlxalq aləmdə çaxnaşma salmaq istəyən sözügedən qüvvələr mənfi reputasiyaya malik olan bəzi nazirlərlərimizlə əlbir olaraq Azərbaycan dövlətinə, prezidentə xəyanət edirlər. Müasir Müsavat Partiyası buna qarşı açıq və ciddi mübarizəyə qalxıb, sentyabrın 22-nə təyin etdiyimiz mitinq də məhz bu mübarizənin bir hissəsidir”.