Azərbaycan niyə mobil telefon istehsal etmir? – Ekspert bunu mümkünsüz sayır
"Azərbaycanda mobil telefonların sıfırdan istehsalı mümkün deyil”.
Sfera.az-a açıqlamasında bu sözləri iqtisadçı ekspert Natiq Cəfərli deyib.
Həmsöhbətimizə görə buna nail olmaq üçün texnoloji, hüquqi baza, kəşflər, mikrosxem və detalların istehsalı vacibdir: "Düşünürəm ki, indiki şəraitdə mobil telefon istehsalının Azərbaycanda həyata keçməsi mümkünsüz görünür. Çünki uzun illərdir bunun alt yapısı qurulmayıb”.
İqtisadçı çıxış yolunu ölkə daxilində böyük brendlərlə ortaq şəkildə mobil telefonların yığılmasında görür: "Çinin və yaxud Avropanın böyük brendlərilə müqavilə bağlayıb Azərbaycanda telefonların yığılmasını təşkil etmək və danışıq əsasında istehsalı ölkəmizə köçürtmək olar. Amma Azərbaycanın öz markası olan mobil telefon istehsalına başlaması mövcus şərtlərləmümkün deyil”.
İqtisadçının sözlərinə görə, Azərbaycan texnoloji cəhətdən inkişaf edən ölkələrdən çox geri qalır, bu sahədə nə elmi araşdırmalara malikik, nə də mikrosxem istehsalını həyata keçiririk: "Öz-özlüyündə ölkəmizin bu məsələni həll etməsi mümkünsüzdür. Azərbaycan sıfırdan başlamaqla mobil telefon istehsal edə bilməyəcək. Amma başqa şirkətlərlə danışıb, onların yığım zavodlarının Azərbaycanda açılmasını təşkil etməklə gələcəkdə heç olmasa istehlak olunan mobil telefonların 30-35 faiz detalını ölkə daxilində istehsal etmək olar. Düşünürəm ki, bu daha doğru istiqamətdir”.
Elçin