Netbuk batareyasının boşalması və ya sıradan çıxması cihazın işləmə sürətinin əhəmiyyətli dərəcədə azalmasına səbəb ola bilər.

Sfera.az bildirir ki, bu barədə "BGR" nəşri məlumat yayıb.

Nəşrin müəllifləri bildiriblər ki, portativ kompüterlərdə quraşdırılmış akkumulyator yalnız cihazın enerji ilə təminatına deyil, həm də ümumi məhsuldarlığına təsir göstərir. Onların sözlərinə görə, batareya zəiflədikdə və ya köhnəldikdə, sistem qəfil sönmənin qarşısını almaq üçün prosessorun gücünü avtomatik şəkildə məhdudlaşdırır.

Mütəxəssislər ilk növbədə istifadəçilərə akkumulyatorun vəziyyətini yoxlamağı tövsiyə edirlər. Bunun üçün cihazın batareya parametrlərinə daxil olmaq kifayətdir. Əgər akkumulyator aşınıbsa, onun dəyişdirilməsi məsləhətdir. Batareya yeniləndikdən sonra laptopun əvvəlki performansı bərpa oluna bilər. Müəlliflər qeyd edirlər ki, bu üsul xüsusilə Windows əməliyyat sistemi ilə işləyən cihazlarda effektiv nəticə verir.

Məqalədə vurğulanır ki, akkumulyator normal vəziyyətdədirsə, problemin səbəbi enerji adapterində və ya batareyanın kifayət qədər enerji qəbul etməməsində ola bilər. Ekspertlər xəbərdarlıq edirlər ki, uyğun olmayan şarj cihazlarından istifadə həm batareyanın ömrünü qısalda, həm də laptopun işinə mənfi təsir göstərə bilər.

Bundan əvvəl "How-To Geek" nəşrinin jurnalistləri Windows əməliyyat sisteminin işini sürətləndirməyin başqa bir üsulunu açıqlamışdılar. Onların sözlərinə görə, avtomatik yüklənən proqramların siyahısını təmizləmək və nadir hallarda istifadə olunan tətbiqləri deaktiv etmək sistemin daha sürətli işləməsinə kömək edə bilər.

İnci

Kompüterinizi belə sürətləndirə bilərsiniz - DETALLAR