Müasir dövrdə uşaqların vaxtlarının böyük hissəsini smartfon, planşet və ya televizor qarşısında keçirməsi valideynləri ən çox narahat edən məsələlərdən biridir.

Rəqəmsal asılılıq uşaqların həm psixologiyasına, həm də zehni inkişafına mənfi təsir göstərir. Lakin alternativ olaraq ev mühitində oynanılan düzgün oyunlar vasitəsilə uşaqların intellektini, məntiqi təfəkkürünü və diqqətini kəskin şəkildə inkişaf etdirmək mümkündür.

Sfera.az xəbər verir ki, müəyyən olunub ki, düzgün seçilmiş stolüstü və məntiq oyunları uşaqların beynində yeni neyron əlaqələrinin qurulmasına birbaşa kömək edir. Bunlardan birincisi vizual yaddaşı və hissələrdən bütövü yaratmaq bacarığını inkişaf etdirən pazllar və lego tipli konstruktorlardır. Bu oyunlar uşaqlarda həm mühəndislik təfəkkürünü, həm də fəza təsəvvürünü formalaşdırır, onlara səbr və diqqət konsentrasiyasını öyrədir. Digər tərəfdən, siyahının başında dayanan şahmat və dama kimi strateji oyunlar uşağa bir neçə gediş sonrasını hesablamağı, analitik düşünməyi və müstəqil qərar qəbul etməyi aşılayır. Heç bir maddi vəsait tələb etməyən söz və yaddaş oyunları da uşaq intellekti üçün əvəzedilməzdir.

Məsələn, zəncirvari söz oyunu və ya masa üzərindəki əşyaların yerini dəyişməklə oynanılan "Nə dəyişdi?" oyunu vizual yaddaşın dərhal işə düşməsinə və söz ehtiyatının zənginləşməsinə xidmət edir. Eyni zamanda, valideynin başlayıb uşağın öz xəyal dünyasına görə davam etdirdiyi birgə hekayə uydurmaq metodikası yaradıcı təfəkkürü və nitq qabiliyyətini maksimum dərəcədə stimullaşdırır. Mütəxəssislər bildiriblər ki, oyun seçərkən uşağın yaşı mütləq nəzərə alınmalıdır, çünki həddindən artıq çətin oyunlar uşaqda özünəinamı qıra bilər, çox bəsit olanlar isə onu darıxdırar.

Ən əsası, oyun prosesində valideynin aktiv iştirakı vacibdir. Bu, həm uşağın psixoloji olaraq özünü güvəndə hiss etməsinə, həm də ailədaxili ünsiyyətin möhkəmlənməsinə şərait yaradır. Telefon və planşetləri bu cür canlı oyunlarla əvəz etmək, gələcəkdə uşağın dərslərindəki müvəffəqiyyətinə də birbaşa müsbət təsir göstərir.

Bəsti Rəfizadə

Sfera.az

Bu oyunlar uşaqların zehni inkişafına kömək edir