Rusiya Prezidenti Vladimir Putin Azərbaycan Prezidenti İlham Əliyevlə görüşəcəyini bəyan edib.

Bu barədə o, dünyanın aparıcı informasiya agentliklərinin rəhbərləri ilə keçirilən görüşdə bildirib.

"Bizim Azərbaycanla bir sıra konkret istiqamətlər üzrə danışıqlarımız var. Hələlik bu barədə danışmağı tez hesab edirəm, lakin bu, ilk növbədə energetikaya aiddir. Prezident Əliyevlə görüşəcəyik və bütün bunlar barədə mütləq danışacağıq", - deyə Putin qeyd edib.

Bəs görüşdə hansı məsələlərə toxunulacaq və müzakirə ediləcək?

Sfera.az-a bu haqda açıqlama verən politoloq Rəşad Bayramovun sözlərinə görə, Putin və Azərbaycan Prezidenti İlham Əliyev arasında baş tutacağı ehtimal olunan görüşdə şübhəsiz ki, regiondakı geosiyasi, iqtisadi və təhlükəsizlik məsələlərinin müzakirəsi ön planda olacaq:

“Son açıqlamalar və iki ölkə arasında mövcud əməkdaşlıq çərçivəsi göstərir ki, görüşdə əsasən bir neçə istiqamət üzrə müzakirələr aparıla bilər. Əvvəla, iqtisadi əməkdaşlıq məsələləri gündəmin önündə olacaq. Putin vurğulayıb ki, Rusiya və Azərbaycan arasında iqtisadi və siyasi əlaqələr “həmişə çox yaxşı və səmimi” olub və bu əməkdaşlığın konkret layihələr və müqavilələr vasitəsilə inkişaf etdirilməsi gözlənilir. Bu baxımdan enerji, nəqliyyat-logistika və ticarət sahələri əsas müzakirə mövzuları ola bilər. Azərbaycan tranzit imkanları və enerji resursları baxımından strateji əhəmiyyətə malikdir, xüsusən də Rusiya üçün alternativ marşrutlar və ixrac imkanlarının diversifikasiyası mövzusu gündəmə gələ bilər”.

Politoloq görüşdə regional təhlükəsizlik və hərbi əməkdaşlıq məsələlərinin də diqqət mərkəzinə gətirilə biləcəyini vurğulayıb:

“Belə ki, Putin bir neçə il əvvəl imzalanmış “Müttəfiqlik Qarşılıqlı Fəaliyyəti haqqında Bəyannamə”ni xatırladaraq, bu sənədin konkret layihələr vasitəsilə zənginləşdirildiyini vurğulamaqla faktiki olaraq hərbi-texniki əməkdaşlıq, kəşfiyyat məlumatlarının mübadiləsi və sülhün qorunması üzrə birgə fəaliyyətlərin davam etdirilməsinə işarə edir. Eyni şəkildə, humanitar və diplomatik əməkdaşlıq məsələləri də müzakirə predmeti ola bilər. Putin Azərbaycanın Rusiyanın İrana humanitar yardımın çatdırılmasında göstərdiyi dəstəyə görə təşəkkürünü bildirib. Bu, Azərbaycanın regional tranzit-logistika rolu və Rusiya üçün strateji körpü kimi əhəmiyyətini bir daha nümayiş etdirir. Görüşdə humanitar yardımların, enerji və ərzaq təhlükəsizliyinin təminatı məsələləri nəzərdən keçirilə bilər. Son olaraq, geosiyasi kontekst də görüşün vacibliyini artırır. Yaxın Şərq və Qafqaz regionunda baş verən dəyişikliklər, İranda baş verənlər, enerji bazarındakı sabitlik və regiondakı təhlükəsizlik çağırışları tərəflərin dialoqunu daha strateji və çoxsahəli edir. Ümumilikdə isə, görüşdə iqtisadi əməkdaşlıq, enerji və tranzit layihələri, hərbi və təhlükəsizlik məsələləri, humanitar dəstək və regional geosiyasət mövzularının əsas müzakirə predmeti olacağını ehtimal etmək olar”.

Bəsti Rəfizadə
Sfera.az

Putin İlham Əliyevlə görüşəcək – Nələr müzakirə ediləcək?