1a:T7bf,

Fransanın paytaxtı Parisdə yerləşən Luvr Muzeyində ötən il baş verən və təxminən 100 milyon dollar dəyərində tarixi zinət əşyalarının oğurlanması ilə nəticələnən məşhur soyğun hadisəsinin filmi hazırlanır.

Sfera.az xarici mediaya istinadən xəbər verir ki, məlumata görə, layihəyə fransız rejissor Romen Qavras rəhbərlik edəcək. Film, “Main basse sur le Louvre” (“Luvrda bir ələ keçirmə”) adlı araşdırma kitabı əsasında çəkiləcək. Kitab “Le Parisien”, Le Monde və “Paris Match” nəşrlərinin jurnalistləri tərəfindən qələmə alınıb. Fransanın Flammarion nəşriyyatı bildirib ki, kitabın film hüquqları Iconoclast istehsal şirkətinə satılıb.

Layihə hazırda inkişaf mərhələsindədir və aktyor heyəti ilə bağlı hələlik rəsmi məlumat açıqlanmayıb. 2025-ci ilin oktyabrında baş verən soyğun zamanı özlərini tikinti işçisi kimi göstərən maskalı şəxslər Luvrun Apollon Qalereyasına daxil olaraq Fransa tac xəzinəsinə aid səkkiz qiymətli zinət əşyasını oğurlamışdılar. Hadisə cəmi bir neçə dəqiqə ərzində həyata keçirilmiş və dünya mediasında geniş rezonans doğurmuşdu.

Soyğun muzeydə ciddi təhlükəsizlik böhranına səbəb olmuş, sonradan muzeyin direktoru Laurense des Kars vəzifəsindən ayrılmışdı. Yeddi aylıq istintaq çərçivəsində əsas şübhəlilər saxlanılsa da, oğurlanan zinət əşyalarının taleyi hələ də müəmmalı olaraq qalır. İstintaq orqanları bu günə qədər qiymətli əşyaların yerini müəyyən edə bilməyiblər. Bununla yanaşı, kitab əsasında ayrıca sənədli film layihəsinin də hazırlandığı bildirilir.

Fidan Hacızadə

Sfera.az

100 milyon dollarlıq Luvr soyğunu filmə çevriləcək