1a:T7af,

Mütəxəssislər uzun illərdir yuxu rejiminin insan sağlamlığına təsirini araşdırırlar. Son tədqiqatlar isə göstərir ki, gec saatlara qədər oyaq qalmaq və nizamsız yuxu rejimi yalnız yorğunluq yaratmır, həm də ömür uzunluğuna təsir edə bilər.

Sfera.az xarici mediaya istinadən xəbər verir ki, müxtəlif universitet və elmi mərkəzlərin apardığı araşdırmalarda gec yatan insanlarda ürək-damar xəstəlikləri, depressiya, diabet və erkən ölüm riskinin daha yüksək olduğu müəyyən edilib.

Vanderbilt Universitetinin alimləri 47 minə yaxın insan üzərində apardıqları araşdırmada müəyyən ediblər ki, illərlə davam edən nizamsız və qeyri-kafi yuxu rejimi ölüm riskini 29 faizə qədər artıra bilər. Tədqiqatda xüsusilə gec yatıb az yatan şəxslərin sağlamlıq problemləri ilə daha çox qarşılaşdığı bildirilib.

Başqa bir araşdırmada isə alimlər 6 saatdan az və ya 8 saatdan çox yuxunun orqanizmdə bioloji qocalmanı sürətləndirdiyini açıqlayıblar. Tədqiqat müəllifləri optimal yuxu müddətinin təxminən 7-8 saat olduğunu vurğulayıblar.

Mütəxəssislərin sözlərinə görə, gec yatmaq bədənin “bioloji saatını” pozur. Bu isə hormon balansına, maddələr mübadiləsinə və beynin fəaliyyətinə mənfi təsir göstərir. Harvard və Stanford universitetlərinin araşdırmalarında da gecə 1-dən sonra yatmağın psixi sağlamlıq problemləri riskini artırdığı qeyd olunub.

Alimlər daha sağlam həyat üçün hər gün eyni saatda yatıb oyanmağı, yatmazdan əvvəl ekran istifadəsini azaltmağı və ən azı 7 saat keyfiyyətli yuxu almağı tövsiyə edirlər.

Firuzə Əliyeva
Sfera.a

Gec yatmaq ömrü qısaldır? – ARAŞDIRMA