Mərkəzi Seçki Komissiyasının (MSK) yeni tərkibdə keçirilən ilk iclasında çıxış edən MSK sədri Məzahir Pənahov seçki prosesinin şəffaflığının təmin olunması istiqamətində görülən işlərdən danışıb.

Sfera.az xəbər verir ki, Məzahir Pənahov əvvəlcə MSK-nın ilk iclasının qanunvericiliyə uyğun olaraq Komissiyanın ən yaşlı üzvü tərəfindən aparıldığını bildirib.

"Doğrudur ki, Mərkəzi Seçki Komissiyasının ilk iclasını ən yaşlı üzv aparmalıdır. MSK-da işləməyə cavan yaşda başlamışam. Seçki Məcəlləsinə əsasən, MSK-nın ilk iclasında sədr, müavinlər və katiblər seçilməlidir", - deyə o qeyd edib.

Məzahir Pənahov həmçinin MSK-nın yeni tərkibinin formalaşdırılmasını təsdiq edən Milli Məclisə və onun sədr seçilməsinə səs verən üzvlərə təşəkkürünü bildirib.

"MSK-nın formalaşdırılmasını təsdiq edən Milli Məclisə və sədr seçilməyimə səs verən üzvlərə təşəkkürümü bildirirəm", - deyə sədr vurğulayıb.

MSK sədri çıxışında seçki prosesində tətbiq edilən veb-kamera sisteminə də toxunaraq bildirib ki, Azərbaycanda seçki məntəqələrində veb-kameraların quraşdırılması beynəlxalq praktikada nadir rast gəlinən təcrübədir.

"Azərbaycanda seçki məntəqələrində veb-kameraların quraşdırılması dünyada analoqu olmayan bir təcrübədir", - deyə Məzahir Pənahov bildirib.
Onun sözlərinə görə, bu sistem sayəsində istənilən şəxs dünyanın istənilən nöqtəsindən seçki prosesini canlı izləyə bilir və bu da seçkilərin şəffaf keçirilməsinə xidmət edir.

Məzahir Pənahov əlavə edib ki, Mərkəzi Seçki Komissiyası bundan sonra da ölkədə seçkilərin azad, ədalətli və şəffaf keçirilməsi üçün bütün zəruri addımları atacaq və fəaliyyətini qanunvericiliyin tələblərinə uyğun davam etdirəcək.

Firuzə Əliyeva
Sfera.az

"MSK-da işləməyə cavan yaşda başlamışam” - Məzahir Pənahov