Gecə saatlarında uzandıqdan sonra ayaqlarda yaranan ağırlıq hissi, nəbz döyüntüsünün hiss edilməsi, sızıldama və ya qıcolmalar bir çox insan tərəfindən adi yorğunluq kimi qəbul edilir.

Sfera.az xəbər verir ki, bu əlamətlər bəzən daha ciddi problemin göstəricisi ola bilər. Həkimlərin sözlərinə görə, bu xəstəlik zamanı damar daxilində yerləşən qapaqcıqlar zəifləyir və nəticədə qan ayaqlardan ürəyə normal şəkildə qayıda bilmir.

Bu isə aşağı ətraflarda qan durğunluğuna səbəb olur. Nəticədə ayaqlarda şişkinlik, ağırlıq hissi, narahatlıq və hətta yuxu keyfiyyətində ciddi azalma müşahidə olunur.

Risk qrupuna daha çox yaşlı insanlar, hamilə qadınlar, artıq çəkidən əziyyət çəkən şəxslər, eləcə də gün ərzində uzun müddət oturaq vəziyyətdə çalışan və ya ayaqüstə qalan insanlar daxildir. Bu şəxslərdə simptomlar xüsusilə günün ikinci yarısında və axşam saatlarında daha qabarıq şəkildə özünü göstərir.

Mütəxəssislər bildirirlər ki, axşam saatlarında artan topuq şişkinliyi, ayaqlarda qaşıntı, gecə krampları və çəkilmə hissi damar problemlərinin ilkin siqnalları kimi qiymətləndirilməlidir. Bu cür əlamətlərə laqeyd yanaşmaq gələcəkdə daha ciddi fəsadlara yol aça bilər.

Həkimlər vurğulayırlar ki, vaxtında aparılan diaqnostika və düzgün müalicə üsulları, o cümlədən damar müalicəsi və varis müdaxilələri, bir çox hallarda həm ayaqlarda yaranan narahatlığı aradan qaldırır, həm də ümumi həyat və yuxu keyfiyyətini əhəmiyyətli dərəcədə yaxşılaşdırır.

Bu səbəbdən mütəxəssislər belə əlamətlər müşahidə edildikdə özbaşına müalicəyə deyil, həkim müayinəsinə üstünlük verilməsini tövsiyə edirlər. Erkən diaqnoz və düzgün yanaşma gələcəkdə daha ağır damar problemlərinin qarşısını almaqda mühüm rol oynayır.

Niyaz Hacıyev
Sfera.az

Ayaqlarda ağrı: Sadə yorğunluqdur, yoxsa damar problemi?