1a:T6c6,

Bakı metrosunda baş verən texniki nasazlıq sərnişin axınına da təsir göstərib.

“Bakı Metropoliteni” QSC Sfera.az-ın sorğusuna cavab olaraq verdiyi məlumata görə, statistik hesabat sərnişin sayına görə deyil, gediş sayına görə aparılır. Qurumdan bildirilib ki, texniki nasazlığın baş verdiyi 21 aprel tarixində metroda ümumi gediş sayı təxminən 540 min olub. Nasazlıq aradan qaldırıldıqdan sonra, yəni 22 apreldə bu göstərici 650 minə yüksəlib.

Müqayisə göstərir ki, nasazlığın baş verdiyi gün metroda gediş sayı növbəti günlə müqayisədə təxminən 110 min az olub. Bu da sərnişin axınında təxminən 17 faiz azalma deməkdir.

Qeyd edək ki, adi günlərdə Bakı metrosunda orta günlük gediş sayı 600-650 min aralığında dəyişir. 21 apreldə qeydə alınan 540 minlik göstərici isə texniki problemin sərnişin daşınmasına təsir etdiyini göstərir.

Xatırladaq ki, aprelin 21-də, saat 12:10 radələrində Bakı metrosunun "Ulduz"-"Nərimanov" mənzili arasında yerləşən kabel xəttində baş verən qısaqapanma nəticəsində təmas şəbəkəsinə gərginliyin verilməsi dayandırılıb. Hadisə səbəbindən saat 15:00-a qədər Bakı Metropoliteninin bütün stansiyalarında sərnişinlərin girişinə müvəqqəti məhdudiyyət tətbiq olunub və bu da minlərlə insanın gündəlik hərəkətində ciddi çətinliklər yaradıb.

Firuzə Əliyeva

Sfera.az

Bir gündə 110 min azalma: metrodakı nasazlığın nəticələri