Son illərdə uşaqlar arasında “fast food” və müxtəlif qeyri-sağlam qidaların istehlakı artmaqdadır.

Mütəxəssislər isə bu tendensiyanın gələcəkdə ciddi sağlamlıq problemlərinə yol aça biləcəyi barədə xəbərdarlıq edirlər.

Sfera.az xəbər verir ki, qidalanma üzrə mütəxəssis həkimlərin sözlərinə görə, yüksək miqdarda şəkər, duz və trans yağ ehtiva edən qidalar uşaqların orqanizminə mənfi təsir göstərir:

“Belə qidalar uşaqlarda piylənmə riskini artırır, həzm sistemini pozur və immuniteti zəiflədir. Həmçinin uzunmüddətli istifadədə diqqət dağınıqlığı və öyrənmə qabiliyyətində zəifləmə müşahidə oluna bilər”.

Pediatrlar da valideynləri daha diqqətli olmağa çağırır. Onların fikrincə, uşaqlarda sağlam qidalanma vərdişləri erkən yaşlardan formalaşdırılmalıdır:

“Uşaq nə yeyirsə, gələcək sağlamlığı da ona uyğun formalaşır. “Fast food” və şirin qazlı içkilər gündəlik rasiondan çıxarılmalı, evdə hazırlanmış təbii yeməklərə üstünlük verilməlidir”.

Psixoloqlar isə vurğulayırlar ki, uşaqlar çox vaxt bu qidalara reklamlar və sosial mühitin təsiri ilə yönəlirlər:

“Reklamlar uşaqlarda yanlış qida seçimi yaradır. Valideynlər nümunə olmalı və uşaqları sağlam alternativlərə yönləndirməlidirlər”.

Mütəxəssislər yekunda bildirirlər ki, uşaqları “abur-cubur” adlandırılan qidalardan uzaq tutmaq təkcə sağlamlıq deyil, həm də gələcək həyat keyfiyyəti baxımından vacibdir.

Mənsumə

Sfera.az

"Fast food" uşaqlarda diqqət dağınıqlığı yaradır - Valideynlərə XƏBƏRDARLIQ