ABŞ Prezidenti Donald Trampın sosial mediada paylaşdığı və onu İsa Məsihə bənzədən süni intellekt qrafiki geniş mübahisələrə səbəb olub.

Sfera.az xəbər verir ki, “Truth Social” platformasında “Əsl Donald Tramp” hesabından yayımlanan görüntü qısa müddət sonra silinib.

Qrafikdə Trampın əllərindən işıq şüaları saçaraq xəstə yatağında olan bir şəxsi sağaltdığı təsvir olunurdu.

ABŞ prezidenti isə yayılan tənqidlərə cavab olaraq bildirib ki, şəkil onu dini fiqur kimi deyil, “insanları sağaldan həkim” kimi təqdim edir. O, medianın məsələni şişirtdiyini iddia edib.

Buna baxmayaraq, paylaşım həm siyasi, həm də dini çevrələrdə ciddi narazılıq doğurub. Hətta Trampın bəzi tərəfdarları da görüntünü tənqid ediblər. Tənqidçilər qrafikin İsa Məsihin xəstələri sağaltmasını təsvir edən dini rəsmlərə bənzədiyini vurğulayıblar.

Şəkildə həmçinin Azadlıq Heykəli, ABŞ bayrağı, qırıcı təyyarələr, Amerika qartalı, tibb bacısı, dua edən qadın və hərbi geyimli şəxs kimi elementlər də yer alıb.

Məlumata görə, paylaşım Papa XIV Leo ilə yaşanan mübahisədən qısa müddət sonra edilib. Papa beynəlxalq ictimaiyyəti müharibələrə son qoymağa çağırmış və dini ritorikadan siyasi məqsədlər üçün istifadəni tənqid edib. Tramp isə onu “zəif mövqe” tutmaqda günahlandırıb.

Bu, Trampın süni intellektlə yaradılmış və mübahisə doğuran ilk paylaşımı deyil. Daha əvvəl o, Barack Obama və həyat yoldaşı Mişel Obama barədə təhqiredici məzmunlu video paylaşmış, sonradan onu silmişdi.

Qeyd edək ki, son hadisə ABŞ-da həm siyasi, həm də dini dəyərlər kontekstində müzakirələri yenidən gündəmə gətirib.

Mənsumə
Sfera.az

Trampın paylaşdığı görüntü qalmaqal yaratdı - FOTO