Tibb sahəsində aparılan yeni tədqiqatlar yaddaş itkisi və demensiya ilə mübarizədə ümidverici bir mərhələyə qədəm qoyub.

Sfera.az xəbər verir ki, isveçrəli tədqiqatçılar qan dövranındakı zərərli zülalları cəmi bir neçə saat ərzində təmizləyə bilən xüsusi "nano-filtr" sistemi üzərində işləyirlər. Elmi araşdırmaların mərkəzində Alzheimer xəstəliyi ilə birbaşa əlaqəli olan və beyində toplanaraq yaddaş funksiyalarını pozan "amiloid beta" zülallarının qandan təmizlənməsi dayanır.

Hazırda eksperimental mərhələdə olan bu metod, orqanizmin özünü bərpaetmə mexanizmini dəstəkləməyi hədəfləyir. Ənənəvi müalicə üsullarından fərqli olaraq, bu yeni yanaşma prosesin sürəti ilə diqqət çəkir. Məhdud sayda pasiyent üzərində aparılan ilkin müşahidələr müsbət dəyişiklikləri göstərir. Belə ki, zərərli zülal səviyyələrinin cəmi bir neçə saat ərzində nəzərəçarpacaq dərəcədə azalması qeydə alınıb. Xüsusilə xəstəliyin erkən mərhələsində olan pasiyentlərdə zehni aydınlıq və gündəlik funksional bacarıqlarda irəliləyiş müşahidə edilib.

Mütəxəssislər bu texnologiyanın təsdiqlənəcəyi təqdirdə, xəstələrin həyat keyfiyyətini qorumaq üçün daha effektiv və daha az zərərli alternativə çevrilə biləcəyini vurğulayırlar. Alimlər xəbərdarlıq edir ki, texnologiya hələlik sınaq və inkişaf mərhələsindədir. Buna baxmayaraq, beynin sağlamlığını qorumaq istiqamətində atılan bu addım, gələcəkdə demensiya və Alzheimer xəstəliklərinin müalicəsində köklü dəyişikliklərə yol aça bilər. Bu kəşf xəstə yaxınları və tibb dünyası üçün yaddaş problemləri ilə mübarizədə yeni və parlaq bir yol xəritəsi kimi dəyərləndirilir.

Firuzə Əliyeva

Sfera.az

Tibbdə ilk - Yaddaşsızlığın saniyələr içərisində HƏLLİ