44 yaşlı amerikalı müğənni Britni Spirs Kaliforniyada sərxoş vəziyyətdə avtomobil idarə etdiyi üçün həbs edilib.

Sfera.az xəbər verir ki, müğənni çərşənbə axşamı saat 21:30 radələrində Kaliforniya Yol Patrul Xidməti tərəfindən saxlanılıb.

Qısa müddət sonra sərbəst buraxılan Spirs, 4 mayda məhkəmə qarşısına çıxacaq.

Həbs sənədlərində müğənninin peşəsi "məşhur" olaraq qeyd olunub, nəqliyyat vasitəsi isə dayanacağa aparılıb. Spirs səhər saat 06:00 radələrində sərbəst buraxılıb.

Xatırladaq ki, bu Spirsin ilk hüquqi problemi deyil. 2007-ci ildə o, Los-Ancelesdə park edilmiş bir avtomobilə çırpıldığına görə dörd ittihamla üzləşib və həbs edilib.

Lakin, avtomobil sahibinə dəyən ziyanı ödədikdən sonra bütün ittihamlar ləğv edilib və sürücülük vəsiqəsi olmadan avtomobil idarə etməyə görə bəraət qazanıb.

Hadisədən sonra Spirs, keçmiş əri Kevin Federlayn ilə paylaşdığı iki oğlunun qəyyumluğunu itirib. 2019-cu ildə məhkəmə qərarına görə, Federlayn uşaqların qəyyumluğunun 70%-ni, Spirs isə yalnız 30%-ni saxlayıb.

Britni Spirsin həbsindən əvvəl İnstaqram hesabı deaktiv edilib və pərəstişkarları hesabın bağlanması ilə bağlı müzakirələrə başlayıblar. Ötən ay Spirs, evdə rəqs etdiyi və qarın əzələlərini nümayiş etdirdiyi enerjili videolar paylaşıb.

Bundan əlavə, Spirsin İngiltərədə yaşamağı istədiyi bildirilir. Yaxın dostları, müğənninin şəxsi və ailə problemləri səbəbindən Britaniyada yaşamaq istədiyini açıqlayıb. Spirs, Kaliforniyada özünü təzyiq altında hiss etdiyini qeyd edərək, “yeni bir ev tikmək üçün fərqli bir yer” arzuladığını bildirib. O, həmçinin Britaniya aksentindən tez-tez istifadə edir və İngiltərəni, eləcə də kral ailəsini sevdiyini vurğulayıb.

Mənsumə
Sfera.az

Britni Spirs yenə məhkəmə qarşısına çıxacaq