Mövcud geosiyasi vəziyyət İran kinosuna yenidən diqqət yetirməyi zəruri edib. Zülmkar rejim altında inkişaf edən İran kinosu ölkənin daxili dinamikasını anlamaq üçün vacib bir pəncərə təqdim edir.

Sfera.az xəbər verir ki, İranın dərin böhranının ortasında kino, ölkənin mədəniyyətinin, cəmiyyətinin və kimliyinin vacib bir hissəsi olaraq teokratik rejimə qarşı güclü ifadə vasitəsinə çevrilib.

İran rejiminin mədəniyyət strategiyası

Ayətullah Ruhullah Xomeyni İslam Respublikasının ilk illərində belə deyib:

“Bir ölkə başqa bir ölkəni işğal etmək istəyəndə əvvəlcə onun mədəniyyətini hədəf alır”.

Bu sözlər İran rejiminin mədəniyyətə strateji baxışını ortaya qoyur. Analitiklər qeyd edirlər ki, rejim iqtisadi sanksiyalar və hərbi təzyiqdən qorxmasa da, mədəni asılılıqdan ehtiyat edir. Bu səbəbdən İran kinosu mühafizəkar siyasətə qarşı tənqidi bir platformaya çevrilib.

Senzura altında inkişaf edən kino

Dövlət nəzarəti, senzura, həbslər və sürgünlərə baxmayaraq İran kinosu beynəlxalq festivallarda böyük uğurlar qazanıb. Repressiya artdıqca filmlərin simvolik dili və mürəkkəb quruluşu daha da güclənir.

İrandakı rejimi anlamağa kömək edən 5 film

1. "Sadə bir qəza"

Rejissor Cəfər Pənahi həbs olunmuş və film çəkilişi qadağan edilmiş bir rejim şəraitində bu filmi istehsal edib. Film sistemdəki çatları səssiz, lakin güclü şəkildə araşdırır və rejim tənqidini ön plana çıxarır.

2. "Müqəddəs əncirin toxumu"

Rejissor Məhəmməd Rəsulof Almaniyada yaşayır. Film Kann Film Festivalında Münsiflər Heyətinin Xüsusi Mükafatı və FIPRESCI mükafatını qazanıb, həmçinin Oskara namizəd olub. Əsərdə hakim olmaq üzrə olan bir vəkilin şəxsi dəyərləri ilə yeni rolu arasındakı ziddiyyəti araşdırılır.

3. "Ən sevdiyim tort"

Rejissorlar Məryəm Müqəddəm və Behtaş Sənaihə İslam Respublikasına qarşı təbliğat səbəbi ilə həbs cəzasına məhkum ediliblər. Film qocalıqda tənhalığı və yenidən əlaqələr qurmaq istəyini təsvir edir. Rejim tərəfindən “əxlaqsız” adlandırılsa da, təsirli və incə hekayəsi ilə diqqət çəkir.

4. "Kritik zona"

Gənc rejissor Əli Əhmədzadə İran cəmiyyətinin görünməyən tərəflərini və gecə həyatını ekranlaşdırır. Film Lokarno Film Festivalında “Ən Yaxşı Film” mükafatına layiq görülüb və İran kinosunun hekayə dünyasını genişləndirib.

5. "Nader və Simin: Ayrılıq"

Bu film İran kinosu üçün dönüş nöqtəsi hesab olunur. Boşanma yaşayan bir cütlüyün hüquqi və mənəvi dilemmasını realist şəkildə əks etdirir. Film Oskar mükafatını qazanaraq İran kinosunu beynəlxalq səhnəyə çıxarıb. Beş il sonra rejissor Əsgər Fərhadi “Satıcı” filmi ilə yenidən Oskar mükafatı əldə edib.

İran rejimi mədəniyyətini xarici təsirlərdən qorumağa çalışsa da, kino ölkənin ən güclü və tənqidi güzgülərindən birinə çevrilib. Bu filmlər vasitəsilə ölkənin sosial, mədəni və siyasi reallıqlarını anlamaq mümkündür.

Mənsumə
Sfera.az

İran kinosu: Zülmkar rejimin iç dünyasına pəncərə