Mağazalarda məhz azyaşlı uşaqlar üçün nəzərdə tutulan kosmetik vasitələr, kremlər, losyon, hətta uşaqlar üçün dodaq boyaları və digər makiyaj məhsullarının sayında artım müşahidə olunur. Valideynlər bu məhsulları adətən “uşaq üçün xüsusi hazırlanıb” ifadəsinə güvənərək təhlükəsiz hesab edirlər. Halbuki uşaqların dərisi böyüklərlə müqayisədə daha incə, daha həssas və xarici təsirlərə qarşı daha müdafiəsizdir.

Valideynləri maraqlandıran suallardan biri isə erkən yaşda kosmetik vasitələrdən istifadənin gələcəkdə dəri problemlərinə səbəb ola bilməsidir.

Bəs uşaqlar üçün satılan həmin vasitələr təhlükəsiz hesab olunurmu?

Sfera.az-a bu haqda açıqlama verən dermatoloq Cavad Paşabəylinin fikirlərinə əsasən, uşaqlara bu vasitələr iki cür təsir göstərə bilər.

Onun sözlərinə görə, belə keyfiyyətsiz məhsullarda dərini qıcıqlandıran və ya dəridə reaksiya yaratmaq qabiliyyətinə sahib olan maddələrin miqdarı çox olur:

“Bu vəziyyət sadə kontakt dermatit adlanır. Digər tərəfdən, istifadə olunan boyalar və ya makiyaj vasitələri keyfiyyətli olsa belə, əgər uşaq atopik dermatitlidirsə, yüksək allergiyası varsa və ya allergiyaya meyillidirsə, bu zaman allergik kontakt dermatit əmələ gələ bilər. Ona görə də istənilən halda valideynlər uşaqlara makiyaj vasitələri tətbiq edərkən diqqətli olmalıdırlar”.

Mütəxəssis məsələyə birtərəfli yanaşmamağı bildirib:

“Birincisi, valideyn uşağın dərisinin həssaslığını bilməlidir. Uşaq indiyə qədər hər hansı xırda nüansa reaksiya veribmi? Hər hansı qidaya qarşı allergik reaksiya, dəridə səpki, qızartı və ya qaşınma olubmu? Bunları mütləq nəzərə almalıdırlar. Körpə vaxtı diatezi, hər hansı dəri reaksiyaları və ya allergiyası olub-olmadığı da dəyərləndirilməlidir. Tətbiq edərkən makiyaj vasitələrinin tərkibinə və saxlanma şəraitinə mütləq diqqət yetirilməlidir ki, daha az hipoallergen vasitələrdən istifadə edilsin. Valideynlərə tərkibində kimyəvi maddələr daha az olan vasitələri seçməyi tövsiyə edirəm, çünki uşaq dərisi böyüklərin dərisinə nisbətən daha həssasdır. Sadəcə valideynlər övladlarının dərisinin xüsusiyyətlərini, allergiyasının olub-olmadığını bilməli və məhsulların tərkibinə mütləq diqqət yetirməlidirlər. Əks halda dəridə allergik, sadə və ya atopik qıcıqlanma, kontakt dermatit, eləcə də ekzema kimi xəstəliklər yarana bilər”.

Bəsti Rəfizadə
Sfera.az

Dermatoloq xəbərdarlıq edir: Bu vasitələr uşaqlar üçün risklidir