İsveç İran İslam İnqilabı Keşikçiləri Korpusunun (SEPAH) terror təşkilatları siyahısına salınması istiqamətində fəaliyyətini davam etdirir. Bu kontekstdə SEPAH-ın beynəlxalq səviyyədə terror təşkilatı kimi tanınıb-tanınmayacağı məsələsi gündəmə gəlir. Hazırda hansı dövlətlərin SEPAH-ı terrorçu qurum kimi tanıdığı və bu təşəbbüsün Avropa İttifaqı daxilində dəstək qazanıb-qazanmayacağı isə maraq doğurur.

Siyasi şərhçi Şakir Ağayev Sfera.az-a açıqlamasında bildirib ki, İsveç SEPAH-ın terror təşkilatı siyahısına salınmasına cəhd göstərir. Onun sözlərinə görə, hazırda bir neçə dövlət SEPAH-ı terror təşkilatı kimi tanıyır:

“Bunlara İsrail, ABŞ, Səudiyyə Ərəbistan, Bəhreyn və Kanada daxildir. Lakin digər ölkələrin də bu addımı ata biləcəyi istisna deyil. İrandakı mürəkkəb vəziyyət, baş verən etirazlar, SEPAH-ın sərt müdaxiləsi və etirazçıların güllələnməsi fonunda, beynəlxalq təşkilatlar, xüsusən Avropa İttifaqı ölkələri və ABŞ SEPAH-ı günahlandırır, bu isə İsveç kimi ölkələrin də hərəkətə keçməsinə şərait yaradır”.

Siyasi şərhçi qeyd edib ki, belə addımlar İrana və SEPAH-a qarşı sanksiyaların sərtləşdirilməsinə, hətta hərbi təzyiqlərin tətbiqinə imkan verə bilər:

“Qeyd etmək lazımdır ki, SEPAH İranda dini liderdən sonra ölkəni idarə edən əsas qüvvələrdən biridir və İranın iqtisadiyyatının 70 faizinə, həmçinin hərbi qüvvələrinə nəzarət edir. SEPAH-a qarşı əməliyyatlar daha böyük qarşıdurmalara səbəb ola bilər, lakin 28 dekabrdan başlayan və son dövrlərin ən güclü etiraz aksiyaları bu addımların atılmasını aktuallaşdırıb”.

Niyaz Hacıyev
Sfera.az

SEPAH terror təşkilatı elan edilə bilərmi? - Beynəlxalq sanksiyalar gündəmdə