Yeni ilin gəlişi ilə birlikdə tez-tez səslənən “At ili”, “Əjdaha ili”, “İlan ili” kimi anlayışlar əslində minilliklərə söykənən Çin təqvim sisteminə əsaslanır.

Sfera.az xəbər verir ki, bu sistemin yaşı 4-5 min ildən çoxdur və sadəcə inanclara deyil, astronomik müşahidələrə də söykənir. Araşdırmalara əsasən, Çin zodiakı 12 heyvandan ibarət dövrü sistem üzərində qurulub. Bu heyvanlar Siçan, Öküz, Pələng, Dovşan, Əjdaha, İlan, At, Keçi, Meymun, Xoruz, İt və Donuzdur. Hər il bu ardıcıllıqla dəyişir və 12 ildən bir eyni heyvan ili yenidən qayıdır. Bildirilir ki, bu bölgünün yaranması bir neçə amillə bağlıdır. Əfsanəvi izaha görə, Buddha heyvanları yanına çağıraraq gəlmə sırasına uyğun olaraq illərə ad verib.

Digər elmi yanaşmaya görə isə sistem Yupiter planetinin Günəş ətrafında təxminən 12 ilə dövr etməsi, Ay-Günəş təqvimi və kənd təsərrüfatı dövrləri ilə əlaqələndirilir.

Qeyd edilir ki, hər heyvan ili müəyyən xarakter xüsusiyyətlərini və dövri enerjini simvolizə edir. Məsələn, Əjdaha ili güc və liderliklə, İlan ili zəka və intuisiya ilə, At ili isə azadlıq, hərəkətlilik və zəhmətkeşliklə əlaqələndirilir. Bu sistem Çin fəlsəfəsindəki Yin-Yang balansı və beş ünsür nəzəriyyəsi ilə birlikdə şərh olunur Araşdırmalara görə, 2026-cı il At ilinə təsadüf edəcək. Çin təqviminə əsasən, At ili 17 fevral 2026-cı ildən başlayacaq.

Tarixi və astroloji mənbələrdə At ili cəmiyyətdə dinamikanın artdığı, sosial və iqtisadi proseslərin sürətləndiyi dövr kimi qiymətləndirilir. Qeyd edək ki, bu təqvim sistemi təkcə Çində deyil, Koreya, Yaponiya, Vyetnam və digər Asiya ölkələrində də əsrlər boyu istifadə olunub və bu gün də mədəni və simvolik əhəmiyyətini qoruyub saxlayır.

Fidan Hacızadə

Sfera.az

Minillik ənənə: At ili insanlara nə VƏD EDİR?