1a:T6f7,

Dünyanın aparıcı yaddaş istehsalçısı olan “Samsung DDR5” tipli operativ yaddaş çipləri üzrə müqavilə qiymətlərini 100 faizdən çox artırıb. Bu qərarın yaxın dövrdə kompüter və server avadanlıqlarının qiymətlərinə ciddi təsir göstərəcəyi gözlənilir.

Sfera.az xəbər verir ki, şirkətdən yayılan məlumata görə, yeni qiymət siyasəti nəticəsində RAM xərcləri kəskin yüksəlib. Bu isə həm fərdi kompüterlərdə, həm də məlumat mərkəzləri üçün nəzərdə tutulan server sistemlərində maya dəyərinin artmasına səbəb olacaq. Mütəxəssislər bildirib ki, qiymət artımının əsas səbəbləri DRAM bazarında yaranan daralma və istehsal gücünün süni intellekt üçün nəzərdə tutulan yüksək səviyyəli serverlərə yönəldilməsidir. Nəticədə, ənənəvi PC və standart server seqmentləri üçün ayrılan yaddaş həcmi azalır.

Qeyd olunub ki, müasir sistemlərin əsas komponentlərindən biri olan DDR5 yaddaşlardakı bu bahalaşma ümumi sistem xərclərinə birbaşa təsir edəcək. Xüsusilə iri həcmli server alışları həyata keçirən şirkətlər üçün əlavə maliyyə yükü yaranacağı proqnozlaşdırılıb. Ekspertlərin fikrincə, “Samsung”un bu strateji addımı 2026-cı ildə kompüter və məlumat mərkəzi məhsullarında qiymətlərin daha da yüksəlməsinə yol aça bilər. Mövcud vəziyyət həm fərdi istifadəçilər, həm də korporativ müştərilər üçün əlavə xərclər deməkdir.

Bəsti Rəfizadə

Sfera.az

Kompüterlər bahalaşacaq