Yağışlı havalarda Bakıda kanalizasiya və yağış suları üçün nəzərdə tutulan lyukların qapaqlarının açıldığı tez-tez müşahidə olunur. Bəzi mütəxəssislər bunun suyun təzyiqi nəticəsində baş verdiyini, digərləri isə axının daha sürətli təmin edilməsi məqsədilə qapaqların qəsdən açıldığını bildirirlər.

Bəs, bu lyukların yağış zamanı açılması məqsədli şəkildə həyata keçirilir, yoxsa hidravlik təzyiq nəticəsində özbaşına baş verir?

Sfera.az məsələ ilə bağlı Azərbaycan Dövlət Su Ehtiyatları Agentliyinə sorğu göndərib.

Agentlikdən sorğuya cavab olaraq bildirilib ki, lyukların açılması yağış sularının idarə edilməsini gücləndirmək üçün məqsədli şəkildə açılır:

“Məlumdur ki, intensiv yağıntılar zamanı yağış sularının ətrafa toplanması halı müəyyən ərazilər üzrə müşahidə edilir. Drenaj sistemlərinin qurulmadığı yollarda və ərazilərdə yağış suları tullantı su xətlərinə yönləndirilir. Bu hal isə kanalizasiya şəbəkələrinin artıq yüklənməsinə və suların daşınmasında maneələrin yaranmasına səbəb olur.

Həmçinin elə ərazilər də var ki, orada təchizat sistemi mövcud deyil. Bu kimi ərazilərdə yaranan problemlərin aradan qaldırılması məqsədilə İri Şəhərlərin Birləşmiş Su Təchizatı Xidməti gücləndirilmiş iş rejimində fəaliyyət göstərir. Tullantı su şəbəkəsi mövcud olmayan ərazilərə müvafiq sukanal idarələrinin qəza briqadaları cəlb edilərək istismar qaydalarının mümkün şərtləri çərçivəsində yığılan suyun maşınlar vasitəsilə çəkilməsi təmin edilir.

Lyukların açılnası yağış sularının idarə edilməsini gücləndiri, yeni kollektorların subasma riskini azaldır”. Qurumdan bildirilib ki, payızda mövsümlə bağlı İri Şəhərlərin Birləşmiş Su Təchizatı Xidməti tərəfindən bütün tullantı və yağış xətlərində monitorinqlər aparılır. Yağış kollektor quyularına, daşıyıcı xətlərə ayrı-ayrılıqda baxış keçirilir. Tutulmalar müşahidə olunan xətlərdə texnikalar vasitəsilə yuyulma işləri icra olunur. ADSEA-nın məlumatına əsasən, agentlik tullantı su təchizatının yaxşılaşdırılması və yeni infrastruktur təminatı məqsədilə bir sıra irihəcmli layihələri icra edir: “Hazırda ADSEA tərəfindən tullantı su təchizatının yaxşılaşdırılması və yeni infrastruktur təminatı məqsədilə bir sıra irihəcmli layihələr icra olunur.

Dərnəgül-Bakıxanov-Qaraçuxur-Hövsan kanalizasiya kollektoru, Lökbatan hövzəsi üzrə gətirici kanalizasiya kollektoru və tullantı sular üçün sutəmizləyici qurğu, Müşfiqabad hövzəsi üzrə gətirici kanalizasiya kollektoru və tullantı sular üçün sutəmizləyici qurğu, Sahil kollektoru, Zığ-Hövsan kanalizasiya kollektorunun qurulması istiqamətində hazırda müntəzəm tikinti-quruculuq işləri icra olunur. Bu layihələrin icrası tullantı sularının idarə edilməsinə, ekoloji vəziyyətinin yaxşılaşdırılmasına və intensiv yağışlar zamanı subasma hallarının qarşısının alınmasına imkan yaradacaq”.

Bəsti Rəfizadə Sfera.az

Yağış sularının idarə edilməsi gücləndirilir: Yeni kollektorlar subasma riskini azaldacaq