5 dekabr Beynəlxalq Könüllülər Günü kimi bütün dünyada qeyd olunur.

Sfera.az xəbər verir ki, BMT tərəfindən 1985-ci ildə təsis edilən bu günün məqsədi könüllülərin cəmiyyətin sosial, humanitar və iqtisadi inkişafında oynadığı mühüm rolu vurğulamaq, onların fəaliyyətini təşviq etməkdir.

2025-ci il üçün günün devizi “Every Contribution Matters” – “Hər töhfə vacibdir” olaraq müəyyən edilib.

Qlobal hesabatlara görə, hazırda dünyada ay ərzində təxminən 2,1 milyard insan könüllülük fəaliyyəti ilə məşğuldur. Bu, dünya üzrə yetkin əhalinin təxminən üçdə birinə bərabərdir. Könüllülük fəaliyyətləri fərqli sahələri əhatə edir: sosial yardım, təhsil, ətraf mühitin qorunması, humanitar dəstək, sağlamlıq xidmətlərində könüllü əmək və s.

Könüllülük yalnız xeyriyyəçilik deyil, həm də davamlı inkişaf məqsədlərinə çatmaq üçün mühüm sosial resursdur. İqlim dəyişikliyinə qarşı mübarizə, bərabərsizliyin azaldılması, icmaların möhkəmləndirilməsi kimi sahələrdə könüllülər aparıcı rol oynayır.

Azərbaycanda son illərdə könüllülük hərəkatı genişlənməkdə davam edir. Xüsusilə gənclər arasında bu sahəyə maraq artır.

2025-ci ildə ASAN Xidmət çərçivəsində “İlin ASAN Könüllüsü” nominasiyası üzrə seçilən gənclər təltif olunub. Ümumilikdə, bu günə qədər 44 minə yaxın gənc ASAN könüllüsü kimi fəaliyyət göstərib. Könüllülər tərəfindən 6500-dən çox təlim, 850-dən artıq yerli və beynəlxalq layihə həyata keçirilib. Yerli icra hakimiyyətləri, dövlət qurumları və QHT-lər tərəfindən ölkənin müxtəlif regionlarında könüllülər üçün sosial layihələr, ekoloji aksiyalar, humanitar proqramlar təşkil olunur.

Könüllülük qısa müddətli fəaliyyətlə məhdudlaşmır, gənclərin sosiallaşması, vətəndaş məsuliyyətinin formalaşması, liderlik və kommunikasiya bacarıqlarının inkişafında mühüm rol oynayır. Ekspertlərə görə, könüllülük həm də əmək bazarında gənclərin rəqabət qabiliyyətini artıran əsas amillərdən biridir.

Sosial sahə üzrə mütəxəssislər vurğulayırlar ki, könüllülər cəmiyyətin ən həssas təbəqələrinə – yaşlılara, əlilliyi olan şəxslərə, aztəminatlı ailələrə, təbii fəlakətlərdən zərər çəkənlərə kömək göstərən “gizli qəhrəmanlardır”. Onların fəaliyyəti bir çox hallarda dövlətin çatmadığı nöqtələrdə sosial boşluqları doldurur.

Könüllülük həmçinin icmalar arasında həmrəylik, birlik və qarşılıqlı dəstək mədəniyyətinin güclənməsinə səbəb olur.

5 dekabr Beynəlxalq Könüllülər Günü könüllülərin əməyinə verilən dəyəri ifadə edir. Hər bir könüllünün fəaliyyəti cəmiyyətin humanist, inkişaf etmiş və daha dayanıqlı olmasına doğru atılan addımdır. 2025-ci ilin devizi isə bu həqiqəti daha aydın göstərir: Hər töhfə vacibdir.

Firuzə Əliyeva
Sfera.az

5 dekabr – Beynəlxalq Könüllülər Günüdür