Ölkələrdə dini və milli tolerantlığın təşviqi sabitliyin, birlik ruhunun və sosial həmrəyliyin qorunmasında əsas rol oynayır.

Sfera.az xəbər verir ki, müxtəlif etnik və dini qrupların birgə yaşaması, qarşılıqlı hörmət və anlaşma mədəniyyəti cəmiyyətin inkişafına təkan verir. Multikulturalizm — müxtəlif milli, etnik, dini və mədəni qrupların birgə yaşadığı cəmiyyətdə onların mədəniyyətlərinin, dil və inanclarının qorunması və hörmətlə yanaşıldığı sosial modeldir. Bu yanaşma cəmiyyətin zənginliyini artırır və fərqli mədəniyyətlərin dialoqunu təmin edir.

Tolerantlıq — başqalarının fikirlərinə, inanclarına, milli və dini xüsusiyyətlərinə hörmətlə yanaşmaq, fərqlilikləri qəbul etmək və onlara qarşı dözümlü olmaq qabiliyyətidir. Tolerant cəmiyyətlərdə qarşılıqlı anlaşma, sülh və sosial sabitlik möhkəmlənir. Ölkəmiz multikulturalizm modeli ilə seçilir və bu, Azərbaycanı regionda nümunəvi dövlətə çevirir. Millətlərarası münasibətlərin möhkəmləndirilməsi yalnız dövlət siyasəti ilə deyil, həm də media və ictimaiyyətin fəal iştirakı ilə mümkün olur. Medianın rolu burada xüsusi əhəmiyyət daşıyır: düzgün informasiya yaymaq, nümunəvi hekayələr təqdim etmək, müxtəlif mədəniyyət və dinlər barədə maarifləndirici materiallar hazırlamaq gənclərdə və geniş əhali arasında tolerantlıq dəyərlərinin formalaşmasına xidmət edir.

Cəmiyyətin informasiya ilə düzgün təmin edilməsi qarşılıqlı anlaşma və hörmətin inkişafına təkan verir. Medianın hazırladığı reportajlar, müsahibələr və sənədli materiallar müxtəlif etnik qrupların həyat tərzini, mədəni irsini və dini inanclarını işıqlandıraraq stereotiplərin aradan qaldırılmasına kömək edir. Stereotip cəmiyyətin insanlardan gözləntiləridir. Millətlərarası və dini dözümlülük yalnız medianın fəaliyyəti ilə deyil, təhsil sistemində də təşviq olunmalıdır. Məktəblərdə və universitetlərdə müxtəlif millət və dinlər haqqında dərslərin keçirilməsi, həmçinin ictimai layihələr və seminarlar gənclərin fərqli mədəniyyətlərə hörmət etməsini təmin edir. Bu yolla gələcək nəsillər tolerantlıq və qarşılıqlı anlaşma dəyərlərini mənimsəyir.

Dini və milli tolerantlıq həm də sülhün qorunması və ölkədə sosial sabitliyin gücləndirilməsi üçün vacibdir. Fərqli mədəniyyətlərin, inancların və ənənələrin bir-birini tamamladığını qəbul etmək, cəmiyyətin zənginliyidir. Bu anlayışın möhkəmləndirilməsi dövlətin daxili və xarici siyasətində uğurlu multikultural modelin davam etdirilməsinə xidmət edir. Son illərdə Azərbaycanda keçirilən müxtəlif festival və tədbirlər, mədəniyyət günləri və ictimai kampaniyalar milli və dini dözümlülüyün təbliğinə yönəlib. Bu təşəbbüslər həm ölkə daxilində, həm də beynəlxalq səviyyədə Azərbaycan modelini nümunəvi göstərir.

Beləliklə, dini və milli tolerantlıq ölkədə həm sosial həmrəyliyin qorunmasında, həm də millətlərarası münasibətlərin inkişafında vacib rol oynayır. İctimaiyyətin bu sahədə aktiv iştirakı gələcəkdə daha dərin və möhkəm tolerantlıq mühitinin formalaşmasına şərait yaradacaq.

Niyaz Hacıyev

Sfera.az

Mövzu: Dini və milli tolerantlıq, millətlərarası münasibətlərin inkişaf etdirilməsi

Qeyd: Yazı Medianın İnkişafı Agentliyinin maliyyə dəstəyi ilə hazırlanıb.

"Dini dözümlülük təhsil sistemində də təşviq olunmalıdır"